شرح سود طویل عرصے تک بلند رہنے کی توقعات کے باعث عالمی مارکیٹ میں سونے کی قیمتوں(Gold Rates) میں منگل کے روز تیزی کا رجحان برقرار نہ رہ سکا، جبکہ سرمایہ کار امریکی فیڈرل ریزرو کے حکام کے بیانات سے آئندہ کی مانیٹری پالیسی کے حوالے سے اشارے حاصل کرنے کے منتظر ہیں۔

رپورٹ کے مطابق اسپاٹ گولڈ کی قیمت معمولی تبدیلی کے بعد 4 ہزار 344.29 ڈالر فی اونس پر رہی، جبکہ امریکی گولڈ فیوچرز کی قیمت بھی 4 ہزار 381.80 ڈالر فی اونس پر مستحکم رہی۔

سونے کو عام طور پر مہنگائی اور جغرافیائی سیاسی خطرات کے خلاف محفوظ سرمایہ کاری سمجھا جاتا ہے، تاہم بلند شرح سود کے ماحول میں اس کی کشش کم ہوجاتی ہے کیونکہ سرمایہ کار ایسے اثاثوں کو ترجیح دیتے ہیں جو انہیں باقاعدہ منافع فراہم کرتے ہیں۔

پیپر اسٹون کے سربراہ برائے تحقیق کرس ویسٹن (Chris Weston) کے مطابق رواں ہفتے امریکی اقتصادی اعداد و شمار محدود ہیں، اس لیے سرمایہ کاروں کی توجہ فیڈرل ریزرو حکام کے بیانات پر مرکوز رہے گی تاکہ یہ اندازہ لگایا جاسکے کہ امریکی مرکزی بینک اکتوبر میں ایک اور شرح سود میں اضافے کی طرف بڑھ رہا ہے یا نہیں۔

کرس ویسٹن نے کہا کہ سرمایہ کار خام تیل کی قیمتوں پر بھی گہری نظر رکھیں گے۔ ان کے مطابق اگرچہ خام تیل کی قیمتیں حالیہ بلند سطح سے کچھ نیچے آئی ہیں، تاہم دوبارہ اضافہ مہنگائی کی توقعات کو بڑھا سکتا ہے، جس کے نتیجے میں شرح سود سے متعلق خدشات مزید شدت اختیار کرسکتے ہیں اور سونے کی قیمتوں پر دباؤ برقرار رہ سکتا ہے۔

مزیدپڑھیں:2027 میں کیا ہوگا؟ خطرناک پیشگوئی سامنے آ گئی

امریکی فیڈرل ریزرو نے گزشتہ ہفتے اپنی پالیسی شرح سود میں 0.25 فیصد پوائنٹ اضافہ کیا تھا اور آنے والے مہینوں میں مزید شرح سود بڑھانے کا عندیہ دیا تھا۔

سینٹ لوئس فیڈ کے صدر البرٹو موسلم (Alberto Musalem) نے بھی کہا ہے کہ مضبوط طلب اور خام اجناس کی قیمتوں میں اضافے کے نتیجے میں پیدا ہونے والی مہنگائی پر قابو پانے کے لیے امریکی مرکزی بینک کو مزید شرح سود میں اضافہ کرنا پڑسکتا ہے۔

البرٹو موسلم کے مطابق فیڈرل ریزرو کے لیے انتظار کرنے کے بجائے جلد اقدام کرنا زیادہ مناسب ہوگا۔

دوسری جانب جغرافیائی سیاسی صورتحال بھی سرمایہ کاروں کی توجہ کا مرکز بنی ہوئی ہے۔ حوثی جنگجوؤں نے یمن میں اہم بلند مقامات پر قبضے کی کوششیں تیز کردی ہیں، جس کے ذریعے بحیرہ احمر کے ساحلی علاقے کو سعودی حمایت یافتہ فورسز کے زیر قبضہ باقی علاقوں سے منقطع کرنے کی کوشش کی جارہی ہے۔

یہ پیش رفت ایک رپورٹ کے بعد سامنے آئی جس میں دعویٰ کیا گیا تھا کہ امریکی صدر ڈونلڈ ٹرمپ (Donald Trump) نے آخری وقت میں حوثیوں کے خلاف امریکی حملے روک دیے تھے۔

ادھر دیگر قیمتی دھاتوں کی قیمتوں میں بھی معمولی اضافہ ریکارڈ کیا گیا۔ اسپاٹ چاندی 0.3 فیصد اضافے کے بعد 66.19 ڈالر فی اونس ہوگئی، جبکہ پلاٹینم 0.3 فیصد اضافے سے 1,792.76 ڈالر فی اونس اور پیلیڈیم 0.3 فیصد اضافے کے بعد 1,305.10 ڈالر فی اونس پر پہنچ گیا۔