وفاقی وزیر برائے امور کشمیر، گلگت بلتستان و سیفران انجینئر امیر مقام(Amir Muqam) اور وزیراعظم آزاد جموں و کشمیر بیرسٹر افتخار گیلانی (iftikhar gilani)کے درمیان مظفرآباد میں ون آن ون ملاقات ہوئی، جس میں آزاد کشمیر کی ترقیاتی ضروریات، عوامی فلاح و بہبود اور باہمی دلچسپی کے امور پر تبادلہ خیال کیا گیا۔ وفاقی وزیر امیر مقام ان دنوں آزاد کشمیر کے دو روزہ دورے پر ہیں۔

وزیراعظم ہاؤس مظفرآباد آمد پر وفاقی وزیر کا پرتپاک استقبال کیا گیا۔ ملاقات کے دوران انجینئر امیر مقام نے وزیراعظم آزاد کشمیر بیرسٹر افتخار گیلانی کو گلدستہ پیش کیا اور نئی ذمہ داریاں سنبھالنے پر نیک خواہشات کا اظہار کیا۔

ملاقات میں آزاد جموں و کشمیر میں جاری ترقیاتی سرگرمیوں، عوامی فلاح و بہبود اور خطے کی موجودہ ترقیاتی ضروریات سمیت مختلف باہمی دلچسپی کے امور پر تفصیلی تبادلہ خیال کیا گیا۔

انجینئر امیر مقام نے وزیراعظم آزاد کشمیر کو یقین دہانی کرائی کہ وفاقی حکومت خطے کی ترقیاتی ترجیحات کے حصول اور عوامی فلاح و بہبود سے متعلق منصوبوں کی تکمیل کے لیے ہر ممکن تعاون جاری رکھے گی۔ انہوں نے کہا کہ وفاقی حکومت آزاد جموں و کشمیر میں ترقی کے عمل کو آگے بڑھانے اور عوام کو بنیادی سہولیات کی فراہمی کے لیے حکومت آزاد کشمیر کے ساتھ بھرپور تعاون اور مؤثر رابطہ کاری کو یقینی بنائے گی۔ وفاقی حکومت کی جانب سے آزاد کشمیر کے ترقیاتی منصوبوں اور عوامی مسائل کے حل کے لیے تعاون جاری رکھنے کا مؤقف پہلے بھی سامنے آچکا ہے۔

 

مزیدپڑھیں:پی ٹی آئی اداروں کو سیاسی رنگ دینے کا ارادہ رکھتی ہے، وزیر مملکت برائے داخلہ طلال چوہدری

وزیراعظم آزاد جموں و کشمیر بیرسٹر افتخار گیلانی نے وفاقی وزیر کی آمد اور منصب سنبھالنے پر نیک خواہشات کا اظہار کرنے پر انجینئر امیر مقام کا شکریہ ادا کیا۔ انہوں نے آزاد کشمیر کی ترقیاتی ترجیحات کے حوالے سے وفاقی حکومت کی جانب سے تعاون اور معاونت کی یقین دہانی کو سراہا۔

ملاقات میں وفاقی حکومت اور حکومت آزاد جموں و کشمیر کے درمیان مختلف امور پر رابطہ کاری مزید مؤثر بنانے اور باہمی دلچسپی کے معاملات پر تعاون کو فروغ دینے کے حوالے سے بھی خیالات کا تبادلہ کیا گیا۔

وزیراعظم آزاد کشمیر افتخار گیلانی نے حالیہ دنوں میں خطے میں معاشی سرگرمیوں کے فروغ، سرمایہ کاری میں اضافے اور روزگار کے مواقع پیدا کرنے کو حکومتی ترجیحات قرار دیا ہے۔