سونے کی قیمتیں(Gold Rates) بدھ کو مستحکم رہیں، تاہم بلند شرح سود کی توقعات کے باعث رواں ماہ مجموعی طور پر کمی کی جانب گامزن رہیں، جبکہ سرمایہ کار امریکی افراطِ زر کے اعداد و شمار کے منتظر رہے تاکہ امریکی فیڈرل ریزرو کی آئندہ پالیسی کے حوالے سے اشارے مل سکیں۔

اسپاٹ گولڈ کی قیمت معمولی تبدیلی کے ساتھ 4,180.30 ڈالر فی اونس رہی، تاہم رواں ماہ اب تک اس کی قیمت میں 6 فیصد کمی ہوچکی ہے۔ امریکی گولڈ فیوچرز کی قیمت 0.8 فیصد اضافے سے 4,212.70 ڈالر فی اونس ہوگئی۔

ڈالر بھی رواں ماہ اضافے کی جانب گامزن تھا، جس کے باعث ڈالر میں قیمت رکھنے والی دھاتیں دیگر کرنسیوں کے حامل افراد کے لیے زیادہ مہنگی ہوگئیں۔

امریکی پرسنل کنزیومپشن ایکسپینڈیچرز (پی سی ای) پرائس انڈیکس کے اعداد و شمار 1230 جی ایم ٹی پر جاری کیے جانے ہیں۔

کریٹیکل میٹلز کے چیف ایگزیکٹو ٹونی سیج نے کہا کہ پی سی ای کے اعداد و شمار کا اجرا سونے کے لیے ایک اہم امتحان ہوگا کیونکہ اس سے امریکی مانیٹری پالیسی، ٹریژری ییلڈز اور ڈالر کی سمت سے متعلق توقعات متاثر ہوسکتی ہیں۔

مزیدپڑھیں:ندا یاسر کی بیٹی صلہ یاسر اپنے آپ کو ’پبلک فگر‘ کہنے پر ٹرول

انہوں نے کہا کہ اگر اعداد و شمار توقع سے کم رہتے ہیں تو اس سے سونے کو ممکنہ طور پر سہارا ملے گا اور قیمت کے دوبارہ 4,200 سے 4,300 ڈالر کی حد میں آنے کی راہ ہموار ہوگی، جبکہ توقع سے زیادہ بلند اعداد و شمار ییلڈز اور ڈالر کو اوپر لے جاسکتے ہیں، جس سے سونے پر دوبارہ دباؤ پڑے گا اور 4,100 ڈالر کی سطح کا امتحان ہوسکتا ہے۔

عام طور پر بلند شرح سود سونے کی کشش کم کردیتی ہے کیونکہ اس دھات سے کوئی منافع یا ییلڈ حاصل نہیں ہوتی۔

اسپاٹ سلور کی قیمت 0.6 فیصد کمی سے 61.07 ڈالر فی اونس، پلاٹینم 0.2 فیصد کمی سے 1,703.19 ڈالر جبکہ پیلاڈیم 0.2 فیصد کمی سے 1,220.61 ڈالر فی اونس ہوگیا۔