اسلام آباد(مانیٹرنگ ڈیسک)ایک طرف حزبِ اختلاف کی جانب سے وزیراعظم کے خلاف تحریک عدم اعتماد جمع کرائے جانے کے بعد حکومت کیلئے مشکلا ت بڑھ گئی ہیں ،وہیں چیئرمین پیپلز پارٹی اپنی جماعت کے اراکین کے ساتھ اسلام آباد کے تھیٹر میں فلم دیکھنے پہنچ گئے۔ بلاول بھٹو زرداری کی کچھ تصاویر سوشل میڈیا پر وائرل ہورہی ہیں جس میں وہ اپنی سیاسی کارکردگی سے بالکل مطمئن سنیما میں بیٹھے فلم سے لطف اندوز ہورہے ہیں۔پیپلز پارٹی کے سینئر رہنما نبیل گبول نے ٹوئٹر پر بلاول کی تصاویر شیئر کرتے ہوئے لکھا کہ چیئرمین پی پی پی اسلام آباد کے ایک تھیٹر میں پارٹی ایم این ایز کے ساتھ فلم دیکھ رہے ہیں۔ انہوں نے مزید لکھا کہ ان کے چہرے پر خوشی ان کے اطمینان کو ظاہر کر رہی ہے ، جبکہ دوسری جانب عمران خان اپنے مستقبل کے بارے میں سوچ کر پریشان ہو رہے ہوں گے۔ایک اور ٹوئٹ میں نبیل گبول نے لکھا کہ ابھی سینٹورس اسلام آباد میں چیئرمین بلاول کے ساتھ فلم دیکھ رہے ہیں۔مذکورہ تصاویر میں واضح طور پر دیکھا جاسکتا ہے کہ چیئرمین بلاول بھٹو کے ہمراہ سینئر رہنما اور سابق وفاقی وزیر خورشید شاہ ، نبیل گبول ، فیصل کریم کنڈی ، سینیٹر شیری رحمان اور شازیہ مری سمیت دیگر افراد بھی تھیٹر میں موجود ہیں۔