اسلام آباد(مانیٹرنگ ڈیسک ) مسلم لیگ ق کے سینئر رہنما او اسپیکر پنجاب اسمبلی چوہدری پرویزالہیٰ نے کہا ہے کہ عمران خان نے بہت دیر کردی،شگاف پڑگیا ہے،حکومت کے تمام اتحاديوں کا جھکاؤ سو فيصد اپوزیشن کی طرف ہے۔
نجی ٹی وی کو انٹرویو میں چوہدری پرویز الٰہی کا کہنا تھا کہ وزيراعظم اب ايک ايک ووٹ والوں سے ملنے کے ليے جارہے ہیں۔ يہ کام پہلے کر ليتے تو نوبت يہاں تک نہ آتی۔
پرویز الٰہی نے کہا کہ سیاست میں کچھ دو اور کچھ لو ہوتا ہے اگروزارت اعلیٰ مل جائے توپی ٹی آئی کی کو تاہیاں دورکردیںگے، انہوں نے کہا کہ حکومت میں سمجھداری کا 100فيصد فقدان نظر آرہا ہے، ايک ہی شخص گھبرايا ہوا پھر رہا ہے۔
انہوں نے مزید کہا کہ اپوزيشن سے جوبات ہوگی اس کے ضامن آصف زرداری ہيں، ايم کيوايم کے آصف زرداری کے ساتھ کچھ مسائل ہيں۔ فيصلے کے قريب پہنچ چکے ہیں مگر ايم کيوايم کی وجہ سے معاملہ رکا ہوا ہے۔
چوہدری پرویز الٰہی نے اشارہ ضرور کيا مگر ق ليگ کا اصولی فيصلہ آنا ابھی باقی ہے کہا اپوزیشن نے وزيراعلیٰ کی آفر کی ہے حکومت نے کوئی آفر نہیںکی۔
پنجاب اسمبلی کے سپیکر نے اتحادیوں کے جھکاؤ سے متعلق بڑا انکشاف کرتے ہوئے کہا کہ عمران خان 100 فیصد مشکل میں ہیں، اتحادیوں کا 100فیصد جھکاؤ اپوزیشن کی طرف ہے، جھکاؤ کو ریورس کرنا عمران خان کی ذمہ داری ہے۔ خان صاحب نے سب کے ساتھ ہاتھ کیا ہے، کسی کو کچھ دیا نہیں، وزیراعلیٰ بنا تو تمام مسائل حل کر دوں گا۔اتحادیوں سے کیے گئے تمام وعدے پورے کریں گے۔
ایک سوال کے جواب میں انہوں نے کہا کہ حکومت کو کچے اور پکے کا پتہ نہیں۔ وزیراعظم عمران خان نے وفاقی وزیر برائے آبی وسائل مونس الٰہی سے کہا تھا پاکستان تحریک انصاف میں اپنی پارٹی میں ضم کر لو، یہ والی آفر بی اے پی پارٹی کو بھی کی گئی، یہ ناسمجھی والی سوچ ہے، مہنگائی، ساڑھے تین سال کی پرفارمنس کی وجہ سے حالات ان کے خراب ہوئے، چھوٹے ہسپتالوں میں مک مکا ہو رہا ہے، صحت کارڈ کا آڈٹ تو کرائیں پہلے۔انہوں نے مزید کہا کہ حکومت میں عقل و دانش کا 100 فیصد فقدان نظر آرہا ہے، حکومت کے علاوہ تمام جماعتوں نے ہمیں پیشکش کی، حکومت کے گھبراہٹ کے فیصلے سامنے آ رہے ہیں، بس ایک ہی شخص گھبرایا ہوا پھر رہا ہے،پہلے حکومت اور پھر اپوزیشن جلسوں کے اعلان منسوخ کرے۔
چودھری پرویز الٰہی کا کہنا تھا کہ تنہا نہیں سب اکٹھے فیصلے کرینگے، ہمارا فیصلہ ایم کیو ایم کی وجہ سے رکا ہوا ہے، ایم کیو ایم کے پیپلز پارٹی کے ساتھ مسائل ہیں، کل کی ملاقات میں آصف زرداری نے ایم کیو ایم کے 70 فیصد معاملات حل کردیئے ہیں، آصف زرداری اپوزیشن کے ضامن بنے ہوئے ہیں، لیگی صدر شہباز شریف کے ساتھ ملاقات جلد ہوگی۔
انہوں نے کہا کہ اپوزیشن خان کوہٹانے کے لیے متحد ہے، یہ جو بھاگ دوڑ کر رہے ہیں یہ حکومت کے لیے پریشانی کی نشانی ہے، حکومت کو اپنے لوگوں سے خطرہ ہے، جہانگیر ترین گروپ عثمان بزدار کو ہٹا کر دم لے گا، ان کے ایڈوائزر تباہی پھیر رہے ہیں، شیخ رشید نے دل میں کیا گلا رکھا ہے پتا نہیں،وزیر داخلہ کے پاس تجربہ ہے ان کو خان صاحب کوسمجھانا چاہیے، جن کے پاس ایک ووٹ ان کے پاس وزیراعظم جا رہے ہیں، وفد بھیجنے کا وقت گزر گیا، وزیراعظم کو خود جانا چاہیے، نواز شریف تمام معاملات پر آن بورڈ ہیں، ن لیگ میں کوئی چپقلش نہیں، مسلم لیگ میں وہی ہوتا ہے جو نواز شریف کہتے ہیں۔