اسلام آباد(مانیٹرنگ ڈیسک) ادویات کی غیر قانونی طور پر کی جانے والی ذخیرہ اندوزی کے خلاف ڈریپ کی جانب سے ملک گیر کریک ڈاؤن جاری ہے۔
تفصیلات کے مطابق وفاقی وزیرصحت کی ہدایت پر پیناڈول کی ذخیرہ اندوزی کیخلاف ڈریپ کی جانب سے بڑی کارروائی کی گئی ہے۔
ترجمان وزارت صحت نے بتایا کہ ڈریپ کی ٹیم نے کراچی کچی گلی میڈیسن مارکیٹ میں الطاف ٹریڈرز پر چھاپہ مارا جس دوران تقریباً دولاکھ باون ہزار پیناڈول کی ٹیبلٹ پکڑی گئیں۔
ترجمان کا کہنا تھا کہ فارمیسی سے بہت غیر وارنٹی شدہ اسٹاک برآمد ہوا جوکہ مشکوک ہو سکتا ہے تاہم ڈریپ کی ٹیم نے اسٹاک کو قبضے میں لے لیا ہے اور اس ضمن میں ٹیسٹ کے لیے نمونے بھی لے لیے گئے ابتدائی رپورٹ پیش کر دی گئی ہے۔
ترجمان وزارت صحت نے بتایا ہے کہ وزیرصحت عبدالقادر پٹیل کی ہدایت پر ملک گیر کریک ڈاؤن جاری ہے جس دوران جعلی، ان رجسٹرڈ اور ذخیرہ اندوزی میں ملوث عناصر کیخلاف قانونی کارروائی کی جارہی ہے۔
ترجمان کا کہنا تھا کہ ذخیرہ اندوزی کی وجہ سے مارکیٹ میں سے اسی دوائی کی مصنوعی قلت پیدا ہوگئی تھی۔
اس حوالے سے وفاقی وزیر برائے صحت عبدالقادر پٹیل نے کہا ہے کہ ملک بھر سے جعلی ان رجسٹرڈ اور غیر معیاری ادویات بیچنے والے کیخلاف ڈریپ ایکٹ کے تحت کاروائی کی جارہی ہے۔
انہوں نے بتایا کہ حکومت کی منظور شدہ قیمت سے زائد بیچنے والوں کے خلاف قانون کارروائی کی جائے گی اور جو عناصر غیر قانونی کاموں میں ملوث پاے گئے ان کیخلاف اہنی ہاتھوں سے نمٹا جائے گا۔
انہوں نے مزید کہا کہ صحت کے شعبے میں بڑے پیمانے پر اصلاحات کی جارہی ہیں اور اس شعبے کی کارکردگی کو بہتر اور یقینی بنانے کیلئے کوشاں ہیں۔
ان کا کہنا تھا کہ عوام سے ہماراچولی دامن کا ساتھ ہے ان سے زیادتی نہیں برداشت کی جائے گی۔
