اسلام آباد(مانیٹرنگ ڈیسک) پاکستان پیپلز پارٹی کے ترجمان ذوالفقار علی بدر نے کہا ہے کہ عمران خان کو اپریل فول نہیں منانے دیں گے، مارچ میں ہی تبدیلی کا جنازہ اٹھے گا۔ اپنے ایک بیان میں ذوالفقار علی بدر نے کہا کہ سپیکر قومی اسمبلی نے اگر او آئی سی اجلاس کی آڑ میں عدم اعتماد کی تحریک کو التوا کا شکار کیا تو ردعمل تو آئے گا۔انہوں نے کہا کہ چیئرمین بلاول بھٹو زرداری او آئی سی کے خلاف نہیں بلکہ او آئی سی کی آڑ میں تحریک عدم اعتماد سے حکومت کے فرار کے خلاف ہیں۔ انہوں نے کہا کہ او آئی سی میں نئی روح پھونکنے والی جماعت پاکستان پیپلزپارٹی ہے، بلاول بھٹو کے نانا نے تنظیم تعاون اسلامی کو پہچان دی۔ ترجمان پیپلز پارٹی نے کہا کہ عمران خان اسپیکر قومی اسمبلی سے ساز باز کرکے او آئی سی کانفرنس کی آڑ میں تحریک عدم اعتماد کے معاملے کو اپریل تک ٹالنا چاہتے ہیں۔ ذوالفقار علی بدر نے کہا کہ عمران خان کو اپریل فول نہیں منانے دیں گے، مارچ میں ہی تبدیلی کا جنازہ اٹھے گا بصورت دیگر دمادم مست قلندر ہوگا۔ ان کا کہنا تھا کہ اگر عمران خان نے خود کو بچانے کے لئے او آئی سی کانفرنس کی آڑ لی تو یہ تنظیم تعاون اسلامی کے مقاصد کا بھی غلط استعمال ہوگا، تحریک عدم اعتماد ایک جمہوری و آئینی حق ہے، کسی بھی چیز کی آڑ لے کر ہم سے دستوری حق نہیں چھینا جاسکتا۔ذوالفقار علی بدرنے کہا کہ چیئرمین بلاول بھٹو زرداری کا ایجنڈا صرف اور صرف پاکستان ہے، غیرملکی ایجنڈے کی باتیں کھسیانی بلی کھمبا نوچے کے مترادف ہیں۔