کوئٹہ (نیوزڈیسک)ڈی جی خوراک گندم قیمت میں اضافہ کی وضاحت کریں ،ڈائریکٹر جنرل فوڈ بلوچستان اور دیگر کو بلوچستان ہائی کورٹ نے طلب کرلیا ۔ گندم قیمتوں سے متعلق آئینی پٹیشن کی سماعت جسٹس محمد ہاشم خان کاکڑ اور جسٹس گل حسن ترین نے کی ۔ درخواست میں چیف سیکریٹری خوراک ۔ پاکستان فلور ملز اور چیمبر آف کامرس کو فریق بنایا گیا ہے ۔ درخواست گزار ایڈوکیٹ سید نظیر آغا نے بنچ کو بتایا کہ صوبے میں آٹے کی قیمت 1400 روپے جبکہ دوسرےصوبوں میں 980 روپے مقرر ہے ۔ بیس کلو آٹے کا بیگ صارف ڈھائی ہزار روپے تک خریدنے پر مجبور ہے ۔ یہ آرٹیکل 25 کی صریح خلاف ورزی ہے ۔ عدالت نے نوٹسز جاری کرتے ہوئے آئندہ ہفتہ فریقین کو عدالت میں پیش ہونےکا حکم دیا ۔ دوسری جانب وزیر خوراک بلوچستان نے بھی گندم قلت کی تصدیق کردی۔ کہتے ہیں قلت کا سامنا ہے ۔ پاسکو سے گندم خریدنے کیلئے بات کررہے ہیں ۔ زمرک خان اچک زئی کا کوئٹہ میں عوام کو سستا آٹا فراہمی کے موقع پر میڈیا بریفینگ میں کہنا تھا جتنا گندم دستیاب ہے ۔ عوام کو سرکاری ریٹ پر فروخت کریں گے ۔ فلور مل مالکان مکمل تعاون کررہے ہیں ۔ 2 لاکھ 90 ہزار گندم کی بوریاں موجود ہیں ۔ لیکن ضرورت دس لاکھ بوریوں کی ہے ۔