لاہور(مانیٹرنگ ڈیسک)وزیرصحت پنجاب ڈاکٹر یاسمین راشد نے سوشل میڈیا پر اپنے انتقال سے متعلق خبروں پر ویڈیو پیغام جاری کردیا۔ سماجی رابطے کی ویب سائٹ ٹویٹر پر جعلی خبریں وائرل ہو رہی ہیں جس میں دعویٰ کیا گیا ہے کہ صوبائی وزیر صحت اور پی ٹی آئی کی سینئر رہنما کینسر کے باعث زندگی کی بازی ہار گئی ہیں۔ یہ خبریں وائرل ہونے کے بعد صوبائی وزیر صحت ڈاکٹر یاسمین راشد نے اپنے ویڈیو پیغام میں کہا کہ سوشل میڈیا پر میرے حوالے سے جھوٹی خبر پھیلائی جا رہی ہے، میں اس وقت صحت مند ہوں،انتقال کی خبریں بے بنیاد ہیں۔ دوسری طرف صوبائی وزیر صحت نے سماجی رابطے کی ویب سائٹ ٹویٹر پر بھی لکھا ہے کہ میں الحمد للہ بالکل ٹھیک اور زندہ ہوں۔ انہوں نے لکھا کہ انتقال کی خبریں بالکل بے بنیاد ہیں۔ ڈاکٹر یاسمین راشد کا کہنا تھاکہ میں فکر مند ہونے اور دعاؤں میں یاد کرنے پر شکر گزار ہوں، میں بالکل صحت مند اور زندہ ہوں۔