اسلام آباد(ممتاز نیوز )صدر مملکت ڈاکٹر عارف علوی نے سیکرٹری جنرل رابطہ عالمی اسلامی ، ڈاکٹر محمد بن عبدالکریم العیسیٰ کو ہلالِ پاکستان عطا کیا،ہلال ِ پاکستان ڈاکٹر محمد بن عبدالکریم کی جانب سے یتیم بچوں کی کفالت ، صحت ، سماجی شعبوں اور پاکستان کیلئے خدمات کے اعتراف میں عطا کیا گیا،بعد ازاں ، صدر مملکت سے سیکرٹری جنرل رابطہ عالمی اسلامی ، ڈاکٹر محمد بن عبدالکریم العیسیٰ نے ملاقات کی ،ملاقات میں وفاقی وزیر برائے مذہبی امور و بین المذاہب ہم آہنگی، مفتی عبدالشکور، سعودی عرب کے سفیر نواف بن سعید المالکی نےبھی شرکت کی،صدر مملکت نے اس موقع پرگفتگو کرتے ہوئے کہاکہ “اسلام فوبیا” مسلمانوں کو درپیش سب سے بڑے چیلنجز میں سے ایک ہے ،اسلام کے حوالے سے دنیا میں پائے جانے والے خوف کو دور کرنے کی ضرورت ہے،اسلام دنیا کے لوگوں کے مابین امن، یکجہتی اور ہم آہنگی کا پیغام دیتا ہے،مختلف اقوام کے لوگوں کو اسلام کے حقیقی پیغام سے آگاہ کرنے کی ضرورت ہے،صدر مملکتنے دنیا میں اسلام کے حقیقی اور ہم آہنگی کے پیغام کو اجاگر کرنے ،بین المذاہب کانفرنسوں، مکالموں اور اجلاسوں کے انعقاد کی ضرورت پر زور دیا،صدرمملکت نے کہاکہ اسلامی معاشروں میں اعتدال پسندی کے فروغ ، دہشت گردی اور عدم برداشت کے خاتمے سے امن اور سماجی و اقتصادی انصاف کے فروغ کو بھی یقینی بنائے جا سکے گا،صدر مملکتنے ہندوستان میں اسلامو فوبیا کے بڑھتے ہوئے رجحان پر تشویش کا اظہار کرتے ہوئے کہا کہ ہندوستان میں اسلام فوبیا کی جڑیں گہری ہیں اور اسکی ریاستی سطح پر سرپرستی کی جارہی ہے،ہندوستان کے مسلمانوں کو اسلامو فوبیا کے منفی اثرات سے بچانے کیلئے ٹھوس اقدامات کی ضرورت ہے،صدر مملکت نے رابطہ عالمی اسلامی کی عالم اسلام میں فلاح و بہبود کے لیے کوششوں، پاکستان میں اسلامی عجائب گھر کے قیام پر عمل درآمد کو سراہا،انہوں نے کہاکہ میوزیم کی تکمیل سے لوگ حضور اکرم ﷺ کی زندگی کے مختلف پہلوؤں کے بارے میں جان سکیں گے