نئی دہلی (مانیٹرنگ ڈیسک)اسلام آباد میں اسلامی تعاون تنظیم (او آئی سی) کے وزرائے خارجہ اجلاس میں مقبوضہ کشمیر کی حمایت میں چینی وزیر خارجہ وانگ ای کا بیان بھارت کو برداشت نہ ہوا اور تلملا اٹھا۔بھارتی میڈیا کے مطابق ترجمان بھارتی وزارت خارجہ ارندام باگچی کا کہنا تھا کہ او آئی سی کانفرنس میں چینی وزیر خارجہ کے بھارت کے حوالے سے بیان کو مسترد کرتے ہیں۔انہوں نے کہا کہ چین یا دوسرے ممالک کا کشمیر پر تبصرہ کرنے کا کوئی جواز نہیں ہے۔ان کا کہنا تھا کہ جموں و کشمیر اور اس سے متعلق مسائل بھارت کا اندرونی معاملہ ہیں۔خیال رہے کہ او آئی سی کانفرنس میں چینی وزیر خارجہ وانگ ای نے مسئلہ کشمیر سے متعلق مسلمان ممالک کے مؤقف کی حمایت کی تھی۔