ٹی ٹوئنٹی ورلڈ کپ کے سیمی فائنل میں انگلینڈ کے خلاف شکست پر جہاں بھارتی شائقین مایوس ہیں، وہیں کرکٹ ماہرین بھی ٹیم کو خوب آڑے ہاتھوں لے رہے ہیں۔ ایسے میں پاکستانی شائقین کہاں پیچھے رہنے والے ہیں وہ بھی بھارت کی شکست پر طنز کے نشتر چلا رہے ہیں۔
ایڈیلیڈ اوول میں انگلینڈ نے بھارت کی جانب سے دیا گیا 168 رنز کا ہدف 16 ویں اوور میں ہی حاصل کر کے بھارت کی اُمیدوں پر پانی پھیر دیا۔
بھارت کے سپورٹس تجزیہ کار وکرانت گپتا نے ٹوئٹ کی کہ ٹی ٹوئنٹی کرکٹ آپ کو رسک فری کرکٹ کھیلنے کی اجازت نہیں دیتا۔
بھارتی کمنٹیٹر ہارشا بھوگلے نے ٹوئٹ کی کہ وہ کئی برسوں سے کوہلی کو دیکھ رہے ہیں، لیکن میں نے کبھی اُن کی آنکھوں میں آنسو نہیں دیکھے تھے، لیکن آج وہ بھی دیکھ لیے۔

I have seen Virat for so many years. I have never seen a tear in his eyes. I saw it today. This was unforgettable

— Harsha Bhogle (@bhogleharsha) October 23, 2022

بھارت کے سابق فاسٹ بالر عرفان پٹھان نے ٹوئٹ کی کہ یہ ٹیم انڈیا کے لیے ایک سبق ہے کہ وہ مضبوط ہو کر واپس آئیں۔
پاکستانی اسپیڈ اسٹار شعیب اختر نے ٹوئٹ کی کہ بغیر کسی نقصان 170 یہ وہ اسکور لائن ہے جو بہت دیر تک بھارت کو ستائے گی۔
بھارت کے سابق بلے باز سنجے منجریکر نے ٹوئٹ کی کہ ٹیم میں کچھ تبدیلیاں کرنے کی ضرورت ہے جس کے بعد بھارت ٹی ٹوئنٹی کی بہترین ٹیم بن جائے گی۔
بھارت کی شکست پر میمز کا سلسلہ بھی جاری ہے جب کہ پاکستانی فینز اور عرفان پٹھان کے درمیان بھی نوک جھونک کا سلسلہ جاری ہے۔
عرفان پٹھان نے نیوزی لینڈ کے خلاف پاکستانی کی کامیابی پر ایک ٹوئٹ کی تھی جس میں اُنہوں نے لکھا تھا کہ ہار جیت چلتی رہتی ہے، لیکن پڑوسیوں گریس آپ کے بس کی بات نہیں ہے۔

Padosiyon jeet ati jaati rehti hai, lekin GRACE apke bas ki baat nahi hai.

— Irfan Pathan (@IrfanPathan) November 9, 2022

اس پر شعیب اختر نے ٹوئٹ کی کہ ارے عرفان کیا ہو گیا ہے؟ کسی نے کچھ کہا ہے تو میں انہیں ڈانٹوں گا۔

ایک صارف بلال بن ثاقب نے ٹوئٹ کی کہ انگلینڈ نے بغیر کوئی وکٹ گنوائے 170 رنز بنا لیے۔ کیا یہ ہوتی ہے گریس؟
بھارت کی شکست پر پاکستان کے وزیرِ اعظم شہباز شریف بھی پیچھے نہیں رہے۔ ایک ٹوئٹ میں اُنہوں نے کہا کہ فائنل میں 170 والوں کا 152 بغیر کسی نقصان والوں سے مقابلہ ہو گا۔
خیال رہے کہ گزشتہ برس دبئی میں ٹی ٹوئنٹی ورلڈ کپ کے میچ میں پاکستان نے بھارت کو دس وکٹوں سے شکست دے دی تھی اور اس کا کوئی کھلاڑی آؤٹ نہیں ہوا تھا۔
ٹی ٹوئنٹی ورلڈ کپ کا فائنل اب پاکستان اور انگلینڈ کے درمیان اتوار کو کھیلا جائے گا۔ میلبرن میں اتوار کو بارش کی پیش گوئی کی گئی ہے، تاہم میچ کے لیے ایک ریزرو ڈے رکھا گیا ہے۔
اگر پیر کو بھی بارش ہوئی تو دونوں ٹیموں کو ٹی ٹوئنٹی ورلڈ کپ کا مشترکہ فاتح قرار دیا جائے گا۔