میلبرن: ٹی20 ورلڈکپ کا فائنل پاکستان اور انگلینڈ کے مابین اتوار کے روز کھیلا جائے گا تاہم بارش نے اب میگا ایونٹ کیلئے اگر ،مگر کا کھیل شروع کر دیا ہے ۔
تفصیلات کے مطابق ٹی 20 ورلڈ کپ کا فائنل 13 نومبر اتوار کے روز میلبرن کے میدان میں کھیلا جائے گا، لیکن محکمہ موسمیات نے میگا ایونٹ کے روز بارش کے کھیل کو متاثر کرنے 95 فیصد تک امکانات ظاہر کیے ہیں، ایسے میں انٹر نیشنل کرکٹ کونسل نے فائنل کیلئے اگلا روز یعنی 14 نومبر سوموار کا روز ریزرو ڈے کے طور پر مختص کیا لیکن محکمہ موسمیات نے اس روز بھی بارش کی پیشگوئی کی ہے ۔
واضح رہے کہ آئی سی سی نے بارش کے پیش نظر ناک آؤٹ مرحلے کے دوران ریزرو ڈے رکھا تھا تاہم دونوں سیمی فائنلز مقررہ وقت پر مکمل ہوئے، ٹی20 ورلڈکپ کے فائنل میں اگر بارش ہوتی ہے تو کھیل اگلے روز پاکستانی وقت کے مطابق دوپہر 3 بجے شروع ہوگا، اگر دوسرے روز بھی بارش کے باعث میچ مکمل نہ ہوسکا تو دونوں ٹیموں کو مشترکہ چیمپئین قرار دیا جائے گا۔
