بانی: عبداللہ بٹ      ایڈیٹرانچیف : عاقل جمال بٹ

بانی: عبداللہ بٹ

ایڈیٹرانچیف : عاقل جمال بٹ

سینئر پارلیمنٹیرین بیگم نجمہ حمید 78 برس کی عمر میں وفات پاگئیں،نمازجناہ آج راولپنڈی میں اداکی جائےگی

اسلام آباد (ممتازنیوز)پاکستان مسلم لیگ (ن) شعبہ خواتین کی سابق صدر، سینئر پارلیمنٹیرین بیگم نجمہ حمید 78 برس کی عمر میں وفات پاگئیں۔ بیگم نجمہ حمید گزشتہ کچھ عرصے سے علیل تھیں۔ جمعہ کی شب راولپنڈی کے ہولی فیملی ہسپتال میں انہوں نے وفات پائی۔ بیگم نجمہ حمید پاکستان مسلم لیگ کی راہنما رکن قومی اسمبلی طاہرہ اورنگزیب کی بڑی بہن اور وزیر اطلاعات مریم اورنگزیب کی خالہ تھیں۔ بیگم نجمہ حمید پاکستان مسلم لیگ (ن) کی مرکزی راہنما اور راولپنڈی میں پارٹی کی پہچان تھیں۔ وہ مسلم لیگ (ن) شعبہ خواتین کی صدر بھی رہیں۔ اس کے علاوہ دو بار وہ سینٹ آف پاکستان کی رکن بھی رہیں۔ بیگم نجمہ حمید پاکستان مسلم لیگ (ن) کے قائد محمد نوازشریف اور ان کی اہلیہ کے انتہائی قریب تھیں۔ بیگم کلثوم کی سیاسی جدوجہد کے موقع پر بیگم نجمہ حمید نے ان کے ہمراہ بھرپور سیاسی جدوجہد میں حصہ لیا۔ وہ اس سیاسی تحریک کے نمایاں اور سرفہرست راہنماؤں میں شامل تھیں۔ بیگم نجمہ حمید 18 مارچ 1944میں ملتان میں پیدا ہوئی تھیں۔ وہ پیدائشی مسلم لیگی تھیں، پاکستان کے پہلے وزیراعظم لیاقت علی خان کی اہلیہ بیگم رعنا لیاقت علی خان اور بیگم فیروز خان نون کے ساتھ وہ مسلم لیگ کے لئے خدمات انجام دیتی رہیں۔ انہوں نے تمام عمر پاکستان مسلم لیگ کے ساتھ بسر کی۔ ان کی سیٹلائٹ ٹاؤن راولپنڈی میں واقع رہائش گاہ پر بیگم کلثوم نظربند رہیں۔ بیگم نجمہ حمید کا گھر ہمیشہ سیاسی سرگرمیوں کا مرکز رہا۔ وہ ایک بہادر اور ذہین سیاسی راہنما کے طور پر جانی جاتی تھیں۔ مرحومہ نے سوگواران میں تین بیٹے چھوڑے ہیں۔ بیگم نجمہ کی نماز جنازہ (آج) ہفتے کو راولپنڈی میں ادا کی جائے گی۔