بیجنگ(مانیٹرنگ ڈیسک )وزیراعظم عمران خان کیخلاف تحریک عدم اعتماد پر چین کا موقف سامنے آگیا۔چینی وزارت خارجہ کی پریس بریفنگ کے دوران وزیر اعظم پاکستان عمران خان کے خلاف اپوزیشن کی تحریک عدم اعتماد سے متعلق سوال کیا گیا کہ پاکستان میں قیادت کی تبدیلی سے پاک چین تعلقات متاثر ہوسکتے ہیں؟ جس پر چینی وزارت خارجہ کے ترجمان وانگ وین بن نے کہا کہ چین دوسرے ممالک کے اندرونی معاملات میں عدم مداخلت کے اصول پر عمل پیرا رہتا ہے،پاکستان چین کا تمام موسموں کا اسٹریٹجک شراکت دار اور دوست و ہمسایہ ملک ہے۔ چین امید رکھتا ہے کہ پاکستان میں تمام فریقین یکجہتی برقرار رکھ سکتے ہیں۔ انھوں نے کہا کہ چین کو امید ہے کہ فریقین مشترکا طور پر پاکستان میں ترقی و استحکام برقرار رکھ سکتے ہیں۔