پیرس(مانیٹرنگ ڈیسک) فرانس کے انٹیلی جنس چیف کو برطرف کر دیا گیا، وہ یوکرین پر روسی حملے سے قبل درست پیش گوئی نہیں کر سکے تھے۔میڈیا رپورٹ کے مطابق یوکرین کی جنگ میں ناکامی پر فرانس کے ملٹری انٹیلی جنس چیف جنرل ایرک وڈاؤڈ کو عہدے سے بر طرف کر دیا گیا، جنرل ایرک پر الزام ہے کہ روسی فوجی آپریشن سے قبل وہ درست پیش گوئی کرنے میں بھی ناکام رہے۔ ایک فوجی ذریعے نے نام ظاہر نہ کرنے کی شرط پرفرانسیسی خبررساں کو بتایا کہ جنرل ایرک وڈاؤڈ، جنھوں نے 7 ماہ قبل ہی ڈائریکٹوریٹ آف ملٹری انٹیلیجنس (DRM) کی قیادت سنبھالی تھی، فوری طور پر اپنے عہدے سے مستعفی ہو رہے ہیں۔ مغربی میڈیا کے مطابق وزارت دفاع کی داخلی تحقیقات میں بھی جنرل ایرک پر ‘ناقص بریفنگ’ اور ‘مسائل پر عبور حاصل کرنے میں ناکامی’ پر تنقید کی گئی تھی۔ اس حوالے سے میڈیا میں سامنے آنے والی رپورٹس میں کہا گیا ہے کہ امریکا نے بالکل درست اندازہ لگایا تھا کہ روس بڑے پیمانے پر یوکرین پر حملے کی منصوبہ بندی کر رہا ہے، جب کہ فرانس نے یہ نتیجہ اخذ کیا کہ اس کا کوئی امکان نہیں، فرانس کے فوجی سربراہ نے جنرل وڈاؤڈ کو اس کا ذمہ دار ٹھہرایا۔