کیا آپ بھی اپنی چھٹیوں کے دوران آفس سے آنے والی فون کالز ، میسیجز اور ای میلز سے پریشان ہیں؟ اگر ایسا ہے تو یہ خبر یقیناً آپ کے دل کو تھوڑا حوصلہ دے گی۔

بھارت کی ٹیکنالوجی کمپنی ڈریم 11 نے اپنے ملازمین کو اسی مشکل سے نجات دلانے  کیلئے ایک نئی اور دلچسپ ’ڈریم 11 ان پلگ ‘پالیسی  متعارف کروائی ہے جس کے پیش نظر سینئرز  بھی اپنے جونیئرز اور کولیگ کو ان کی چھٹیوں کے دوران پریشان کرتے وقت سوچنے پر مجبور ہیں۔

بھارتی میڈیا کے مطابق کمپنی ڈریم 11 کی جانب سے اپنے تمام ملازمین کیلئے ’ڈریم 11 ان پلگ پالیسی متعارف کروائی گئی ہے جس کا مقصد ملازمین کو ان کی چھٹیوں کے دوران پرسکون رکھنا ہے جو کہ آفس سے آنے والی کالز، میسیجز اور ای میلز کے ذریعے خراب ہو سکتا ہے۔

بھارتی میڈیا سے گفتگو کرتے ہوئے کہ کمپنی کے شریک بانیوں کا کہنا تھا کہ کمپنی کے تمام ملازمین کو سال میں ایک بار ہفتے بھر کی چھٹی دی جاتی ہے جس دوران ملازمین کو کالز ، ای میل اور  پیغامات نہیں بھیجے جا سکتے۔

کمپنی عہدیداران کے مطابق کوئی بھی شخص کسی ملازم کے ان پلگ ٹائم کے دوران اگر انھیں ڈسٹرب کرے تو انھیں 1200 ڈالر ( تقریباً1 لاکھ بھارتی روپے) جرمانہ ادا کرنا پڑے گا۔

بھارتی میڈیا کے مطابق کمپنی کی جانب سے زیر غور پالیسی گزشتہ برس فروری میں متعارف کروائی گئی تھی جو اب تک بہتر طریقے سے جاری ہے۔