اسلام آباد (مانیٹرنگ ڈیسک) سینئر صحافی جاوید چودھری نے تحریک انصاف کے سابق رہنماء علیم خان سے ملاقات اور ریحام خان سے عمران خان کی شادی کے موضوع پر ہونیوالی گفتگو سے پردہ اٹھا دیا۔

جاوید چودھری نے لکھا کہ علیم خان نے بتایا کہ ریحام خان کے ساتھ شادی میں ان کا  کنٹری بیوشن بالکل نہیں تھا‘ ریحام خان لاہور میرے گھر آئی تو عمران خان کی بہنیں میرے ساتھ ناراض ہو گئیں۔بنی گالا میں عمران خان سے پوچھا ‘آپ کا ریحام خان کے ساتھ کیا معاملہ ہے؟ ان کا جواب تھا‘ میں نے اس سے شادی کر لی ہے لیکن ابھی اناؤنس نہیں کی‘ میں نے کہا‘ آپ یہ شادی اناؤنس کر دیں آپ کی بہنیں مجھ سے ناراض ہو رہی ہیں‘ عمران خان نے جواب دیا ’’عورتوں کو مجھ سے زیادہ کون جانتا ہے؟ میں کس سے شادی کرتا ہوں میری بہنوں کو اس سے کیا مطلب؟ بہرحال عمران خان نے نکاح کے ڈیڑھ ماہ بعد شادی ڈکلیئر کر دی۔

ریحام خان کی طلاق میں عمل دخل سے متعلق سوال کے جواب میں علیم خان کاکہناتھاکہ یہ طلاق صرف دو لوگوں کی وجہ سے ہوئی‘ بشریٰ بی بی اور شوکت قادری‘ بشریٰ بی بی نے عمران خان سے کہا تھا‘ آپ نے اگر اسے 24گھنٹے میں طلاق نہ دی تو آپ کبھی وزیراعظم نہیں بن سکیں گے جبکہ شوکت قادری نے کہا تھا ریحام تمہیں سوٹ نہیں کرتی اور یوں طلاق ہوگئی‘‘ ۔

شوکت قادری کے بارے جاوید چودھری کے سوال پر  ان کا جواب تھا’’ یہ میرے حلقے میں انجینئرنگ یونیورسٹی کے قریب رہتے ہیں‘ ان کا مدرسہ میاں معراج کے صاحبزادے حامد معراج کے گھر کے پیچھے ہے‘ یہ اچھے اور نیک بزرگ ہیں‘ عمران خان مجھے ایک دن ان کے پاس لے گئے‘ قادری صاحب بڑے پیار سے ملے۔عمران خان نے ان سے پندرہ منٹ تنہائی میں ملاقات کی اور مجھے راستے میں بتایا‘ مجھے قادری صاحب نے کہا ہے ریحام خان تمہارے لیے ٹھیک نہیں ہے‘ مجھے ان کے لہجے سے محسوس ہوا ، یہ طلاق کا ارادہ کر چکے ہیں لیکن طلاق بہرحال بشریٰ بی بی کے حکم پر ہوئی تھی‘‘۔

بشریٰ بی بی سے پہلی ملاقات بارے ان کاکہناتھاکہ ’’مجھے عمران خان نے ان کے پاس بھیجا تھا‘ یہ انھیں شوکت قادری سے بھی بڑا پیر سمجھتے تھے‘ ہم لاہور میں کلمہ چوک کے قریب خاور مانیکا کے گھر میں بھی بی بی سے ملے تھے‘ بشریٰ بی بی کا دعویٰ تھا‘ عمران خان پر کسی نے جادو کر رکھا ہے اور خان صاحب ان کی ہر بات کو حرف آخر سمجھتے تھے، میں ان کا صرف احترام کرتا تھا لہٰذا یہ مجھ سے مایوس ہو گئیں‘۔