کراچی (نیوز ڈیسک )پاکستان شوبز انڈسٹری کی خوبرو اداکارہ سارہ خان کا کہنا ہےکہ رمضان میں لوگ ہلکے پھلکے ڈرامے دیکھنا چاہتے ہیں۔
ایک نجی ویب سائٹ کو دئیے گئے انٹرویو میں سارہ خان نے رمضان میں نشر ہونے والے اپنے ڈرامے ’ہم تم‘ میں پہلی مرتبہ مزاحیہ کردار ادا کرنے پر گفتگو کی۔
سارہ خان نے بتایا کہ پہلے یہ سمجھا جاتا تھا کہ وہ صرف معصوم، رونے والے کردار کرسکتی ہیں تاہم پھر انہوں نے ڈرما ’ثبات‘، ’رقصِ بسمل‘ اور ’بیلا پور کی ڈائن‘ کیا تو لوگوں کو خیال آیا کہ وہ دوسرے کردار بھی کرسکتی ہیں، اس سے پہلے لوگ ان کے ساتھ تجربہ کرنے سے کچھ گھبراتے تھے۔
انہوں نے کہا کہ یہ کردار انہوں نے ایک طرح سے خود کو چیلنج کرنے کے لیے کیا ہے۔
سارہ خان نے بتایا کہ وہ خود بھی رمضان کے ڈرامے شوق سے دیکھتی ہیں بلکہ ’اپنے شوہر کے ساتھ‘ دیکھتی ہیں تو اس مرتبہ وہ مجھے دیکھیں گے تو زیادہ اچھا لگے گا۔
رمضان کے لیے خصوصی طور پر بنائے گئے اس ڈرامے کے بارے میں ان کا کہنا تھا کہ روزہ کھول کر لوگ ذرا ہلکے پھلکے ڈرامے دیکھنا چاہتے ہیں۔ وہ ہنسنا چاہتے ہیں تاکہ ان کا دن اچھا گزرے۔
