اسلام آباد: متنازع ٹوئٹ کے کیس میں ایف آئی اے پراسیکیوٹر نے عدالت سے اعظم سواتی کے ناقابل ضمانت وارنٹ گرفتاری جاری کرنے کی استدعا کردی۔

اسپیشل جج سینٹرل اسلام آباد کے روبرو متنازع ٹوئٹ کیس کی سماعت ہوئی، جس میں اعظم سواتی کی عدم حاضری کے باعث فرد جرم کی کارروائی مؤخر کردی گئی۔

دوران سماعت ایف آئی اے پراسیکیوٹر کی جانب سے اعظم سواتی کے ناقابل ضمانت وارنٹ گرفتاری جاری کرنے کی استدعا کی گئی۔ تفتیشی افسر نے عدالت کو بتایا کہ وارنٹ کی تعمیل کی کارروائی کی ہے۔ وارنٹ کی تعمیل کے وقت اعظم سواتی اپنے گھر میں موجود نہیں تھے۔
دوران سماعت اعظم سواتی کے وکیل سہیل خان نے عدالت کو بتایا کہ میرا اعظم سواتی سے رابطہ نہیں ہو سکا ۔ تفتیشی افسر وارنٹ کی تعمیل کے لیے کہاں گئے ،کیسے تعمیل کروائی۔ تفتیشی افسر کی جانب سے تعمیل کی رپورٹ پر وکیل کا نمبر دیا گیا ۔ جب تعمیل نہیں کروائی گئی تو پراسس کو دوبارہ دہرایا جاتا ہے ۔ اعظم سواتی کی مستقل رہائش اسلام آباد میں ہے ،آبائی علاقہ مانسہرہ ہے ،یہ 2 اعظم سواتی کی رہائش گاہ ہیں۔

عدالت نے وارنٹ کی تعمیل کروانے والے اہل کار کو طلب کرتے ہوئے سماعت میں وقفہ کردیا۔