کراچی(نیوزڈیسک)انگلش کاؤنٹی کرکٹ میں اظہر علی کے بیٹ نے دھوکا دے دیا، ووسٹرشائر کیلیے 3 چیمپئن شپ میچز میں پاکستانی بیٹر کے 34 رنز بیٹنگ میں زوال کی نشاندہی کرنے لگے جب کہ ابھی تک وہ 20 رنز سے آگے نہیں بڑھ سکے ہیں۔پاکستانی کپتان اظہر علی کی کارکردگی کافی عرصے سے غیرمستقل مزاجی کا شکار ہے، آسٹریلیا سے ہوم سیریز میں بھی وہ ایک سنچری اور ففٹی کے سوا باقی اننگز میں قابل ذکر اسکور نہیں کرپائے تھے، کاؤنٹی چیمپئن شپ میں اب تک کھیلے جانے والے 3 میچز میں اظہر کا بیٹ مکمل طور پر خاموش دکھائی دے رہا ہے۔ووسٹرشائر نے اظہر علی کے تجربے کو مدنظر رکھتے ہوئے میتھیو ویڈ کی جگہ بطور غیرملکی کرکٹر خدمات حاصل کی تھیں ،ان سے بہت زیادہ توقعات بھی وابستہ کرلی گئی تھیں، معاہدے پر دستخط کے موقع پر چیئرمین پال پرائیجن نے کہا تھا کہ ہم ایک انتہائی باصلاحیت بیٹر کی خدمات حاصل کررہے ہیں،اظہر ہمارے ڈریسنگ روم کا ایک قیمتی اثاثہ ثابت ہوں گے۔Advertisementالبتہ ابھی تک اپنی پرفارمنس سے اظہر علی نے ووسٹرشائر کو بھی کافی مایوس کیا ہے، پہلے میچ میں وہ صرف 2 اور 1 رنز پر آؤٹ ہوگئے تھے، دوسرے مقابلے میں 20 رنز بنانے کے بعد ہمت جواب دے گئی ، تیسرے میچ میں بھی ان کی اننگز 6 اور 5 رنز تک محدود رہیں، اس دوران 3 میچز میں انھوں نے مجموعی طور پر 34 رنز بنائے۔دوسری جانب پاکستان سے تعلق رکھنے والے شان مسعود اور محمد رضوان کاؤنٹی کرکٹ میں بیٹنگ کے خوب جوہر دکھا رہے ہیں خصوصا اوپنر کی کارکردگی تو غیرمعمولی رہی ہے،بولنگ میں شاہین شاہ آفریدی، حسن علی اور حارث رؤف کی کارکردگی بھی عمدہ رہی،محمد عباس بھی اپنی سوئنگ بولنگ سے حریف بیٹرز کو پریشان کر رہے ہیں۔