لبنان کے وزیر خارجہ عبداللّٰہ بو حبیب نے اسرائیل لبنان جنگ سے متعلق امریکی صدر کے بیان پر مایوسی کا اظہار کیا ہے۔

نیویارک میں میڈیا سے گفتگو کرتے ہوئے انہوں نے کہا کہ بائیڈن کی اقوام متحدہ میں تقریر امید افزا نہیں تھی، اس سے مسئلہ حل نہیں ہوگا۔

انہوں نے مزید کہا کہ پھر بھی پرامید ہوں، امریکا واحد ملک ہے جو مشرق وسطیٰ میں صورتحال بدل سکتا ہے۔

لبنان کے وزیر خارجہ کا کہنا تھا کہ ہمارے بچاؤ کے لیے امریکا کا کردار اہم ہے، لبنان خود سے لڑائی ختم نہیں کرسکتا۔

ان کا مزید کہنا تھا کہ ماضی کی مایوسیوں کے باوجود امریکا کی مدد درکار ہے۔

عبداللّٰہ بو حبیب نے یہ بھی کہا کہ لبنان میں جنگ سے اسرائیلیوں کی گھروں کو واپسی میں مدد نہیں ملے گی، اسرائیلیوں کی واپسی کا حل صرف مذاکرات ہیں۔

دوسری جانب لبنان اسرائیل جنگ پر سلامتی کونسل کا اجلاس پاکستانی وقت کے مطابق کل رات 3 بجے ہوگا۔