اسلام آباد(نیوز ڈیسک)جمعیت علمائے اسلام (جے یو آئی) کے رکن قومی اسمبلی، نور عالم خان نے اپنی ہی جماعت کے سربراہ مولانا فضل الرحمان کی پالیسیوں پر شدید اعتراضات اٹھا دیے ہیں۔ نور عالم خان نے فوجی عدالتوں کی حمایت کرتے ہوئے کہا کہ وہ اسمبلی میں بھی اس کی حمایت جاری رکھیں گے۔ انہوں نے اپنے بیان میں کہا، ’’اگر میرے دل میں کوئی چور نہیں اور میں ملک کے خلاف نہیں تو مجھے فوجی عدالتوں سے ڈرنے کی ضرورت کیوں ہے؟‘‘
نور عالم خان کے ان بیانات سے واضح ہوتا ہے کہ جے یو آئی کے اندر مولانا فضل الرحمان کی قیادت اور ان کی حکومتی پالیسیوں کے حوالے سے اختلافات بڑھ رہے ہیں۔ نور عالم خان نے مزید کہا کہ انہوں نے مولانا کو پی ٹی آئی کی حمایت سے باز رہنے کا مشورہ دیا تھا، لیکن ان کی بات کو نظرانداز کر دیا گیا۔
سیاسی تجزیہ کاروں کے مطابق نور عالم خان کا یہ مؤقف ظاہر کرتا ہے کہ جے یو آئی میں اندرونی طور پر کئی ارکان فضل الرحمان کی سیاسی حکمت عملی سے ناخوش ہیں۔ اس سے پہلے یہ اختلافات جماعت کے اندر محدود تھے، مگر اب میڈیا پر بھی کھل کر سامنے آنے لگے ہیں۔







