بانی: عبداللہ بٹ      ایڈیٹرانچیف : عاقل جمال بٹ

بانی: عبداللہ بٹ

ایڈیٹرانچیف : عاقل جمال بٹ

وزیرِاعظم اعلیٰ سطحی وفد کے ہمراہ دو روزہ سرکاری دورے پر متحدہ عرب امارات روانہ

لاہور(نیوز ڈیسک)وزیرِاعظم محمد شہباز شریف ایک اعلیٰ سطحی وفد کے ہمراہ دو روزہ سرکاری دورے پر متحدہ عرب امارات روانہ ہوگئے۔ یہ دورہ متحدہ عرب امارات کے نائب صدر، وزیرِاعظم اور دبئی کے فرمانروا عزت مآب شیخ محمد بن راشد آل مکتوم کی دعوت پر کیا جا رہا ہے۔

وزیرِاعظم شہباز شریف دبئی میں منعقدہ ورلڈ گورنمنٹس سمٹ 2024 میں شرکت کریں گے اور اجلاس سے خطاب بھی کریں گے۔ اس موقع پر وہ متحدہ عرب امارات کی قیادت کے ساتھ اہم ملاقاتیں کریں گے اور عالمی سربراہان سے بھی تبادلہ خیال کریں گے۔

وزیرِاعظم کے اس دورے کا مقصد پاکستان اور متحدہ عرب امارات کے درمیان تعلقات کو مزید مستحکم بنانا اور اقتصادی و سرمایہ کاری کے مواقع کو فروغ دینا ہے۔ وزیرِاعظم پاکستانی کمیونٹی اور متحدہ عرب امارات میں کاروباری برادری سے بھی ملاقات کریں گے تاکہ دوطرفہ تجارتی تعلقات کو مزید وسعت دی جا سکے۔

وزیرِاعظم کے ہمراہ نائب وزیرِاعظم و وزیرِخارجہ اسحاق ڈار، وفاقی وزراء خواجہ آصف، احد خان چیمہ، محمد اورنگزیب، سردار اویس لغاری، عطاء اللہ تارڑ اور معاون خصوصی طارق فاطمی بھی موجود ہیں۔

یہ وزیرِاعظم شہباز شریف کا وزارت عظمیٰ کا منصب سنبھالنے کے بعد متحدہ عرب امارات کا دوسرا سرکاری دورہ ہے، جو پاکستان اور متحدہ عرب امارات کے درمیان سفارتی، تجارتی اور اقتصادی تعاون کو مزید فروغ دینے میں معاون ثابت ہوگا۔