اسلام آباد(نیوز ڈیسک)ملک بھر میں چینی کی قیمتوں میں بے قابو اضافہ عوام کے لیے ایک نئے معاشی بحران کی شکل اختیار کرتا جا رہا ہے۔ حکومت کے تمام دعوے اور وعدے محض بیانات کی حد تک محدود نظر آتے ہیں، جبکہ زمینی حقائق کچھ اور ہی کہانی سنا رہے ہیں۔
کراچی سے پشاور تک چینی 200 روپے کلو میں فروخت
کراچی، لاہور، پشاور، کوئٹہ اور دیگر بڑے شہروں میں چینی کی قیمت 180 سے 200 روپے فی کلو کے درمیان پہنچ چکی ہے۔ پشاور میں نرخ 205 روپے تک جا پہنچے ہیں، جبکہ کوئٹہ میں 190 روپے کلو میں چینی فروخت ہو رہی ہے۔ کراچی کی ہول سیل مارکیٹ میں چینی 180 روپے فی کلو ہے، لیکن پرچون میں 185 سے 200 روپے کلو تک کے نرخ سننے کو مل رہے ہیں۔
شوگر ملز سے ترسیل بند، مارکیٹ میں قلت
چینی کی قیمتوں میں اس ہوشربا اضافے کی بڑی وجہ شوگر ملز سے سپلائی میں تعطل ہے۔ کئی علاقوں میں مل مالکان نے چینی کی ترسیل روک رکھی ہے، جس کے باعث مارکیٹ میں مصنوعی قلت پیدا ہو چکی ہے۔
نوشہروفیروز جیسے چھوٹے اضلاع میں بھی چینی 200 روپے فی کلو میں فروخت ہو رہی ہے، اور صورتحال حکومتی کنٹرول سے باہر ہوتی نظر آ رہی ہے۔
حکومتی دعوے کہاں کھڑے ہیں؟
وفاقی حکومت نے چند ماہ قبل چینی کی ایکس مل قیمت 165 روپے فی کلو مقرر کرنے کا اعلان کیا تھا۔ اس سے قبل مارچ میں قیمت 159 روپے اور گزشتہ سال جون میں 140 روپے رکھی گئی تھی۔ لیکن ایکس مل قیمت مقرر ہونے کے باوجود مارکیٹ میں اس کا کوئی اثر نہیں پڑا۔
چینی برآمد کی اجازت اور اس کے اثرات
2024 میں حکومت نے 7.5 لاکھ ٹن چینی برآمد کرنے کی اجازت دی تھی، جس کے بعد ملکی سطح پر چینی کی قلت بڑھنے لگی۔ حکومت کا کہنا ہے کہ موجودہ صورتحال کو قابو میں لانے کے لیے 5 لاکھ میٹرک ٹن چینی درآمد کرنے کی اجازت دی جا چکی ہے۔
شوگر مل مالکان نے یہ یقین دہانی کروائی تھی کہ برآمدات سے مقامی مارکیٹ متاثر نہیں ہوگی، مگر حالات اس کے برعکس نظر آتے ہیں۔
ذخیرہ اندوز سرگرم، گودام چینی سے بھر گئے
مارکیٹ میں چینی کی دستیابی کم ہوتے ہی ذخیرہ اندوزوں نے موقع غنیمت جانا۔ شوگر ملز کی ترسیل بند ہونے کے بعد ان لوگوں نے چینی اپنے گوداموں میں چھپا لی ہے تاکہ زیادہ منافع پر فروخت کر سکیں۔
ماہرین کا انتباہ
معاشی تجزیہ کاروں کا کہنا ہے کہ اگر فوری اور سخت اقدامات نہ کیے گئے تو چینی کی قیمت 220 روپے فی کلو تک پہنچ سکتی ہے۔ اس سے نہ صرف عام صارف شدید متاثر ہوگا بلکہ ملک میں مہنگائی کی ایک نئی لہر کا آغاز ہو سکتا ہے۔








