فرانسیسی صدر ایمانوئل میکرون نے اقوام متحدہ سے مطالبہ کیا ہے کہ غزہ کو مسلسل جنگ کے دائرے سے نکالنے کے لیے وہاں ایک بین الاقوامی استحکامی مشن قائم کیا جائے۔
صدر میکرون نے اسرائیل کی جانب سے غزہ پر مکمل فوجی کنٹرول کے منصوبے کو “دائمی جنگ کی جانب خطرناک قدم” قرار دیا۔ ان کا کہنا تھا کہ ایسی کسی حکمت عملی سے سب سے زیادہ نقصان عام شہریوں اور یرغمالیوں کو ہوگا۔
فرانسیسی صدر نے اقوام متحدہ کی سلامتی کونسل پر زور دیا کہ وہ فوری طور پر غزہ میں قیامِ امن کے لیے ایک مؤثر اور مضبوط بین الاقوامی مشن پر کام شروع کرے، جو وہاں شہریوں کو تحفظ فراہم کرے، نظم و نسق بحال کرے اور حالات کو مستحکم بنائے۔

میکرون کا کہنا تھا کہ میں نے اپنی ٹیموں کو ہدایت دی ہے کہ شراکت داروں کے ساتھ فوری طور پر اس مشن کی تیاری شروع کریں۔ دنیا کو اب غزہ میں ایک مستقل جنگ بندی کی ضرورت ہے۔ جنگ کو ختم ہونا چاہیے۔
یاد رہے کہ فرانسیسی صدر کا یہ بیان اسرائیلی سکیورٹی کابینہ کی جانب سے غزہ سٹی پر مکمل فوجی قبضے کے منصوبے کی منظوری کے بعد سامنے آیا ہے، جس پر عالمی سطح پر شدید تنقید ہو رہی ہے۔
واضح رہے کہ گزشتہ ماہ صدر میکرون نے فلسطین کو بطور ریاست تسلیم کرنے کا عندیہ دیا تھا، جس کے بعد برطانیہ اور کینیڈا جیسے ممالک نے بھی اسی موقف کی حمایت کی، جس سے دنیا بھر میں فلسطینی ریاست کے حق میں آوازیں مزید مضبوط ہو رہی ہیں۔