شارجہ (ویب ڈیسک)متحدہ عرب امارات کے مڈل آرڈر بلے باز آصف خان نے کہا ہے کہ پاکستان کے خلاف شکست ٹیم کی ناتجربہ کاری کے باعث ہوئی، ورنہ نتیجہ مختلف ہو سکتا تھا۔

شارجہ میں پاکستان کے خلاف 35 گیندوں پر 77 رنز کی اننگ کھیلنے کے بعد پریس کانفرنس کرتے ہوئے آصف خان نے کہا کہ ہمارا پلان آخری اوورز میں پاور ہٹنگ کا تھا، مگر پاکستان کی بولنگ نے منصوبہ کامیاب نہیں ہونے دی۔

انہوں نے کہا کہ ہم نے بڑی ٹیموں کو ویک اپ کال دی ہے اور ایشیا کپ کے لیے پراعتماد ہیں۔ اماراتی کپتان محمد وسیم کی اننگز کو سراہتے ہوئے آصف خان نے ان کے رن آؤٹ کو نقصان دہ قرار دیا۔

آصف خان کا کہنا تھا کہ شارجہ ہمارا ہوم گراؤنڈ ہے، اس نے سپورٹ کیا۔ ہم نے پچھلے ہفتوں میں بھرپور ٹریننگ کی، اس کا پھل ضرور ملے گا۔

انہوں نے کہا کہ اماراتی ٹیم کی اصل طاقت ٹی ٹوئنٹی میں ہے۔ اگر بالنگ کے ذریعے حریف کو 170 سے 180 رنز تک روکا جائے تو میچ جیتنے کے امکانات روشن ہیں۔

واضح رہے کہ آصف خان 1990 میں لاہور میں پیدا ہوئے اور 2007 سے 2014 تک 32 فرسٹ کلاس میچ کھیل چکے ہیں۔