سکھر میں پریس بریفنگ کے دوران سندھ حکومت کے ترجمان اور میئر سکھر ارسلان اسلام شیخ نے کہا کہ صوبے میں چار ستمبر کو بڑا سیلابی ریلا داخل ہوگا، جس دوران ہائی فلڈ کی صورتحال پیدا ہوگی تاہم سپر فلڈ سے نمٹنے کے لیے مکمل تیاری کر لی گئی ہے۔

انہوں نے بتایا کہ سیلاب کے پیش نظر 36 مقامات کو حساس قرار دیا گیا ہے، جب کہ اس صورتحال سے 16 ہزار دیہات اور لگ بھگ 16 لاکھ افراد متاثر ہوسکتے ہیں۔

ارسلان شیخ نے کہا کہ گڈو بیراج ساڑھے 12 لاکھ اور سکھر بیراج ساڑھے 9 لاکھ کیوسک پانی سنبھالنے کی صلاحیت رکھتے ہیں، اس لیے کسی بیراج کو خطرہ نہیں۔ ان کا کہنا تھا کہ حفاظتی بندوں کو مزید مضبوط بنا دیا گیا ہے اور انتظامیہ ہر سطح پر الرٹ ہے۔