خیبرپختونخوا اسمبلی میں جعلی تعلیمی اسناد پر بھرتی ہونے والے ملازمین کا انکشاف ہوا ہے، جس کے بعد اسمبلی سیکرٹریٹ نے متعدد افراد کے خلاف قانونی کارروائی کا آغاز کر دیا  ۔
 اسناد کی تصدیق پر انکشاف
اسمبلی سیکرٹریٹ کے مطابق یہ انکشاف اُس وقت سامنے آیا جب ملازمین کی تعلیمی اسناد کی جانچ پڑتال کا عمل شروع کیا گیا۔ تصدیق کے دوران معلوم ہوا کہ درجن سے زائد ملازمین نے جعلی اسناد جمع کرائیں تھیں۔
■  ذرائع کا کہنا ہے کہ جعلی ڈگری رکھنے والوں میں نہ صرف گریڈ 19 کا ایک ریٹائرڈ افسر شامل ہے، بلکہ گریڈ 18 تک کے حاضر سروس افسران بھی اس فہرست میں شامل ہیں۔
  سات ملازمین کے خلاف کارروائی جاری
اب تک 7 ملازمین کے خلاف کارروائی شروع کر دی گئی ہے، جن کی اسناد جعلی ثابت ہو چکی ہیں۔ اسمبلی سیکرٹریٹ کا کہنا ہے کہ ان افراد کے خلاف قانون کے مطابق اقدامات کیے جا رہے ہیں۔
ادارے کے مطابق وہ ملازمین جنہوں نے اب تک اپنی تعلیمی اسناد جمع نہیں کرائیں، انہیں نوٹسز جاری کیے جا چکے ہیں، اور ان سے جلد وضاحت طلب کی جائے گی۔