عوامی نیشنل پارٹی (اے این پی) خیبرپختونخوا کے صدر میاں افتخار حسین نے کہا ہے کہ کالاباغ ڈیم متنازع منصوبہ ہے اور کالا باغ ڈیم منصوبہ اے این پی کسی صورت قبول نہیں کرے گی۔
پشاور میں میڈیا سے گفتگو میں میاں افتخار حسین کا کہنا تھاکہ اے این پی آج بھی اپنے تاریخی مؤقف پرقائم ہے، مردہ منصوبے کو زندہ نہیں ہونے دیں گے، پنجاب کے عوام کے نقصان پر اتنا ہی دکھ ہے جتنا اپنے عوام کے دکھ پر ہوتا ہے۔
انہوں نے کہا کہ کالاباغ ڈیم متنازع منصوبہ ہے اور کالا باغ ڈیم منصوبہ اے این پی کسی صورت قبول نہیں کرے گی۔
ان کا کہنا تھاکہ کالاباغ ڈیم سے سیلاب کا کوئی تعلق نہیں، یہ بھارتی دریاؤں کے پانی سے آیا ہے، کالاباغ ڈیم پربےبنیاد دعوے عوام کوگمراہ کرنے اور ملک کوغیرمستحکم کرنےکی کوشش ہے، یہ منصوبہ خیبر پختونخوا، سندھ اور بلوچستان کے لیے تباہی ہے۔
میاں افتخار حسین کا کہناتھاکہ اگر ڈیم بنانا ہے توبھاشا ڈیم بنایا جائے جس کااختیار براہِ راست خیبرپختونخوا کے پاس ہوگا۔
انہوں نے کہاکہ علی امین گنڈاپوربانی پی ٹی آئی سے بھی وفادارنہیں رہے، صوبے سے کیا وفاداری کرے گا؟
خیال رہے کہ گزشتہ دنوں وزیراعلیٰ خیبرپختونخوا علی امین گنڈا پور نے کالاباغ ڈیم بنانے کی حمایت کی تھی۔