گلگت بلتستان (نیوز ڈیسک) پاکستان کے مختلف علاقوں سے تعلق رکھنے والی خواتین کوہ پیماؤں پر مشتمل ٹیم نے 5400 میٹر بلند بری لا چوٹی سر کر کے نئی تاریخ رقم کر دی۔

پاکستان کے نامور کوہ پیما ساجد علی سدپارہ نے سماجی رابطے کی ویب سائٹ ایکس پر بتایا کہ یہ مہم الپائن کلب آف پاکستان کے زیر اہتمام منعقد ہوئی، جس میں بہادر خواتین نے شاندار کارنامہ سرانجام دیا۔ انہوں نے کہا کہ اس مہم کی قیادت کرنا ان کے لیے باعث فخر ہے اور یہ اقدام ملک میں ایڈونچر ٹورازم کو فروغ دینے کے لیے اہم سنگ میل ہے۔

یہ تاریخی مہم الپائن کلب آف پاکستان کی گولڈن جوبلی کے موقع پر منعقد کی گئی۔ ٹیم میں چاروں صوبوں، گلگت بلتستان، آزاد کشمیر اور اسلام آباد سے تعلق رکھنے والی خواتین کوہ پیما شامل تھیں۔