وفاقی وزیر منصوبہ بندی احسن اقبال نے کہا ہے کہ پاکستان میں پائیدار ترقی اور مؤثر حکمرانی کے لیے ضروری ہے کہ عوام کو فیصلہ سازی کے عمل میں شامل کیا جائے اورادارہ جاتی احتساب کو ترقیاتی ایجنڈے کا حصہ بنایا جائے۔
اسلام آباد میںآواز II پروگرام کے افتتاحی سیشن سے خطاب کرتے ہوئے انہوں نے کہا کہ شفافیت، شراکت داری اور سماجی انصاف پاکستان کی ترقی کے بنیادی ستون ہیں۔ ان کا کہنا تھا کہ کوئی بھی قوم عوام کی آواز شامل کیے بغیر ترقی نہیں کر سکتی۔
احسن اقبال نےاُڑان پاکستان فریم ورک کا ذکر کرتے ہوئے بتایا کہ یہ وژن تعلیم، برآمدات، ماحولیات، توانائی اور مساوات پر مبنی ہے، جس کا مقصدپاکستان کو جدید، پائیدار معیشت میں تبدیل کرنا ہے۔
انہوں نے نوجوانوں کو ترقی کے عمل میں شامل کرنے کی حکومتی کوششوں کا ذکر کرتے ہوئے کہا کہ: 60 ہزار سے زائدادائیگی شدہ انٹرن شپس دی جا رہی ہیں، جن میں 10 ہزار بلوچستان کے نوجوانوں کے لیے ہیں۔ینگ ڈیولپمنٹ فیلو پروگرام کے ذریعے مستقبل کے پالیسی ماہرین تیار کیے جا رہے ہیں۔ 131 تعلیمی اداروں میں ینگ پیس اینڈ ڈویلپمنٹ کور قائم کیا گیا ہے۔
وفاقی وزیر نے کہا کہ “آواز II پروگرام” نے کمزور طبقات کو آواز دی اور پالیسی سازی کا حصہ بنایا، جوشراکتی حکمرانی کی بہترین مثال ہے۔ آخر میں انہوں نے زور دیا کہ اگرعوامی آواز کو پالیسیوں کا حصہ بنایا جائے تو پاکستان ایک شفاف، مضبوط اور منصفانہ معاشرہ بن سکتا ہے۔