آئی سی سی ویمنز ورلڈ کپ میں پاکستان کا آخری گروپ میچ بھی بارش کی نذر ہو گیا، جس کے ساتھ ہی قومی ویمنز ٹیم کا ایونٹ میں سفر کسی بھی فتح کے بغیر اختتام پذیر ہوا۔
کولمبو میں کھیلے جانے والے میچ میں سری لنکا نے ٹاس جیت کر پہلے فیلڈنگ کا فیصلہ کیا۔ تاہم بارش کے باعث میچ کو 34، 34 اوورز فی اننگز تک محدود کر دیا گیا۔ پاکستان نے جب 4.2 اوورز میں 18 رنز بنائے تھے، تب دوبارہ بارش شروع ہو گئی جو پھر نہ تھمی، اور امپائرز کو بالآخر میچ ختم کرنے کا اعلان کرنا پڑا۔
اس نتیجے کے بعد پاکستان ٹیم اپنے تمام 7 میچ مکمل کر چکی ہے، جن میں سے کوئی بھی جیتنے میں کامیاب نہ ہو سکی۔ گرین شرٹس کو 4 میچوں میں شکست کا سامنا کرنا پڑا، جبکہ 3 میچ بارش کے باعث منسوخ ہوئے۔
سری لنکا کا حال بھی کچھ مختلف نہیں رہا۔ آئی لینڈرز نے ٹورنامنٹ میں 7 میں سے صرف ایک میچ جیتا، 3 میں ہار کا سامنا کیا اور 3 مقابلے موسم کی نذر ہو گئے۔
واضح رہے کہ ویمنز ورلڈ کپ کے سیمی فائنل مرحلے کے لیے آسٹریلیا، انگلینڈ، جنوبی افریقا اور بھارت کی ٹیموں نے کوالیفائی کر لیا ہے، جبکہ جیوسوپر ایونٹ کے تمام دلچسپ مقابلے براہِ راست نشر کر رہا ہے۔