کراچی میں نیپا چورنگی پر تین سالہ بچے کے مین ہول میں گرنے کے افسوسناک واقعہ پر میئر کراچی مرتضیٰ وہاب نے کہا ہے کہ اس وقت ریسکیو کا کام جاری ہے، اہلخانہ کی ہر ممکن مدد کرینگے۔

کراچی میں میڈیا سے گفتگو میں انہوں نے کہا کہ والد کا موقف سنا ہے، جس میں انہوں نے رات گئے مشینری نہ ملنے کا شکوہ کیا، اس سلسلے میں واٹر کارپوریشن کو تحقیقات کا حکم دیدیا ہے، اگر کوئی افسر غفلت میں ملوث ہوا تو اس کے خلاف کارروائی ہوگی۔

میئر کراچی نے کہا کہ کل رات سے اس مسئلے پر سیاست کرنے کی کوشش کی گئی جو بڑی بدقسمتی ہے۔ سی سی ٹی وی فوٹیج نکلوا رہا ہوں کہ معاملہ کیا ہوا ہے۔

انہوں نے کہا کہ مین ہول میں گرنے والے بچے کی تلاش جاری ہے، 500 میٹر کے حصے کو کھود چکے ہیں، میں تمام انتظامیہ سے رابطے میں ہوں۔ اہلخانہ کی ہر ممکن مدد کریں گے۔

مرتضیٰ وہاب نے کہا کہ ڈیپارٹمنٹل اسٹور کے سامنے مین ہول کور نہیں تھا، مین ہول کے کھلے ہونے کی تحقیقات کر رہے ہیں کہ مین ہول کتنے دن سے کھلا تھا یا اسے کھولا گیا تھا۔

ان کا کہنا تھا کہ اردو سائنس کالج کے برابر سے برساتی نالہ گزر رہا ہے، جس مین ہول میں بچہ گرا وہ برساتی نالہ ہے، متاثرہ خاندان کے ساتھ ہیں اور اظہار تعزیت کرتے ہیں۔