برطانوی پارلیمانی انڈر سیکریٹری آف اسٹیٹ برائے مشرقِ وسطیٰ، افغانستان اور پاکستان ہمیش فالکنر نے کہا ہے کہ برطانیہ پاکستان کے مجرموں کی حوالگی کے معاملے میں کسی بھی انفرادی کیس پر تبصرہ نہیں کر سکتا۔
ہمیش فالکنر نے مزید کہا کہ قانون کی خلاف ورزی کرنے والوں کے خلاف اقدامات پاکستان اور برطانیہ حکومتی سطح پر باہمی تعاون سے حل کیے جا سکتے ہیں۔
انہوں نے کہا کہ برطانوی حکومت مڈل ایسٹ کے لیے فراہم کی جانے والی امدادی رقم کو پاؤنڈ ٹو پاؤنڈ میچ کرے گی اور فلسطین کو ایک مستقل ریاست کے طور پر تسلیم کرنا اہم تھا۔ لندن میں فلسطینی سفارت خانے میں فلسطینی پرچم کا لہرانا بھی ایک اعزاز ہے۔
ہمیش فالکنر نے یہ بھی واضح کیا کہ غزہ میں امدادی سامان پہنچانے میں اسرائیل یا کوئی اور رکاوٹ نہیں بن سکتا اور برطانیہ غزہ میں مکمل اور مستقل جنگ بندی کا حامی ہے۔
ان کا کہنا تھا کہ برطانیہ پاکستان اور بھارت کے ساتھ تمام اہم معاملات پر مسلسل رابطے میں رہے گا۔