شاہین چوک انڈر پاس کی تکمیلسے ٹریفک کا دبائو کم ہوگا،محسن نقوی

اسلام آباد(نیوزڈیسک) وفاقی دارالحکومت میں شاہین چوک انڈر پاس منصوبہ تکمیل کے آخری مراحل میں داخل ہو گیا ہے اور آئندہ ہفتے ٹریفک کے لیے کھول دیا جائے گا۔ منصوبے کا 90 فیصد کام مکمل ہو چکا ہے۔

وفاقی وزیر داخلہ محسن نقوی نے شاہین چوک انڈر پاس کا دورہ کیا اور سائٹ پر جاری تعمیراتی سرگرمیوں کا تفصیلی معائنہ کیا۔ وزیر داخلہ نے منصوبے کی پیش رفت کا جائزہ لیتے ہوئے مقررہ مدت میں تکمیل یقینی بنانے اور کام کی رفتار برقرار رکھنے کی ہدایت کی۔

چیئرمین سی ڈی اے نے وزیر داخلہ کو اب تک مکمل ہونے والی پیش رفت کے بارے میں تفصیلی بریفنگ دی۔ بریفنگ کے مطابق منصوبے کے انڈر پاس کا اسٹرکچرل کام مکمل ہوچکا ہے، جبکہ روڈ ورک اور فنشنگ کے کام جاری ہیں۔ وزیر داخلہ نے ہدایت کی کہ تعمیراتی کاموں میں معیار پر کوئی سمجھوتہ نہ کیا جائے۔

وزیر داخلہ نے مرکزی مقام پر واقع منصوبے کے اطراف جدید لینڈ اسکیپنگ اور شجرکاری کی بھی ہدایت دی۔ اس موقع پر چیئرمین سی ڈی اے، آئی جی اسلام آباد، ممبران سی ڈی اے، ایڈیشنل ڈپٹی کمشنر اسلام آباد اور دیگر متعلقہ افسران بھی وزیر داخلہ کے ہمراہ تھے۔

وزیر داخلہ نے کہا کہ شاہین چوک انڈر پاس کھلتے ہی مرکزی شاہراہوں پر ٹریفک روانی بحال ہوگی اور اسلام آباد میں ٹریفک دباؤ میں نمایاں کمی آئے گی۔