اسلام آباد(نیوزڈیسک)پاکستان تحریک انصاف نے وزیراعظم کی دوبارہ مذاکرات کی پیشکش مسترد کردی۔ترجمان تحریک انصاف شیخ وقاص اکرم کا کہنا ہے کہ پی ٹی آئی حکومت سے کسی بھی قسم کی بات چیت میں شامل نہیں ہوگی، وزیراعظم کی جانب سے مذاکرات کی پیشکش دوغلا پن ہے۔
شیخ وقاص اکرم نے کہا کہ وزیراعظم،سہیل آفریدی کی عمران خان سے ملاقات نہیں کر سکے تومذاکرات کیوں کریں؟ بانی پی ٹی آئی نے مذاکرات کا اختیار محمود اچکزئی اور راجاناصرعباس کو دیا ہے۔
یاد رہے کہ گزشتہ روز وفاقی کابینہ اجلاس میں اظہار خیال کرتے ہوئے وزیر اعظم شہباز شریف نے کہا ہے کہ حکومت پاکستان ملکی ترقی وخوشحالی اور سیاسی ہم آہنگی کے لیے تمام سیاسی جماعتوں سے پرامن ڈائیلاگ کے اپنے اصولی موقف پر قائم ہے، ذاتی طور پر تمام سیاسی جماعتوں کو متعدد بار ڈائیلاگ کی پیشکش کی جا چکی ہے سیاسی ڈائیلاگ کی آڑ میں امن و امان کی صورتحال کو خراب کر نے کی کسی مذموم کوشش کو کامیاب نہیں ہونے دیا جائے گا۔
دوسری جانب وزیراعظم کی جانب سے پی ٹی آئی کو مذاکرات کی پیشکش پر نیشنل ڈائیلاگ کمیٹی بھی سرگرم ہوگئی۔ فواد چوہدری، عمران اسماعیل اور محمود مولوی پر مشتمل کمیٹی نے وزیراعظم کی پیش کش کا خیرمقدم کیا ہے۔
نیشنل ڈائیلاگ کمیٹی نے وزیراعظم کو خط لکھ کر کوٹ لکھپت جیل میں قید پی ٹی آئی قیادت کو پیرول پر رہا کرنے کی درخواست کردی۔ کہا اعتماد سازی کے بغیر مذاکرات کا عمل کامیاب اور پائیدار نہیں ہو سکتا۔
