وفاقی حکومت نے عادل فاروق راجا پر انسدادِ دہشت گردی ایکٹ کے تحت پابندی عائد کر دی ہے۔ یہ فیصلہ وفاقی کابینہ کی جانب سے داخلہ ڈویژن کی سرکولیشن سمری کی منظوری کے بعد کیا گیا۔
حکام کے مطابق عادل فاروق راجا پر پابندی انسدادِ دہشت گردی ایکٹ 1997 کی دفعہ 11 ڈبل اے کے تحت لگائی گئی ہے، جس کا اطلاق ان افراد یا عناصر پر کیا جاتا ہے جن کی سرگرمیاں ریاستی سلامتی کے لیے خطرہ سمجھی جائیں۔
وفاقی کابینہ نے اس فیصلے پر عملدرآمد کو یقینی بنانے کے لیے متعلقہ اداروں کو ہدایت کی ہے کہ سات دن کے اندر عملدرآمد رپورٹ کابینہ ڈویژن کو جمع کرائی جائے۔
حکومتی ذرائع کا کہنا ہے کہ یہ اقدام قومی سلامتی اور قانون کی عملداری کو یقینی بنانے کے لیے اٹھایا گیا ہے، جبکہ پابندی سے متعلق مزید قانونی کارروائیاں بھی طے شدہ طریقہ کار کے تحت آگے بڑھائی جائیں گی۔