واشنگٹن (انٹرنیشنل ڈیسک)عالمی میڈیا اور سوشل پلیٹ فارمز پر ایک تصویر تیزی سے وائرل ہو رہی ہے جس میں امریکی صدر ڈونلڈ ٹرمپ  کو برفانی خطے(گرین لینڈ) میں امریکی پرچم لہراتے ہوئے دکھایا گیا ہے، جبکہ قریب ہی نصب بورڈ پر “گرین لینڈ  امریکی علاقہ، 2026” درج ہے۔ تصویر میں ان کے ہمراہ نائب امریکی صدر جے ڈی وینس اور امریکی وزیرخارجہ مارکوروبیو بھی موجود ہیں، پس منظر میں برف پوش پہاڑ اور کھلا میدان دکھائی دیتا ہے۔

تصویر کے سامنے آنے کے بعد سوشل میڈیا صارفین اور مبصرین کی جانب سے اسے جغرافیائی سیاست اور عالمی طاقتوں کی علامتی کشمکش سے جوڑا جا رہا ہے۔ کئی حلقوں کا کہنا ہے کہ یہ تصویر کسی سیاسی پیغام، طنزیہ اظہار یا ممکنہ مستقبل کے منظرنامے کی عکاسی ہو سکتی ہے، تاہم اس کی سرکاری حیثیت یا حقیقت پر کوئی باضابطہ تصدیق سامنے نہیں آئی۔

ماہرین کے مطابق گرین لینڈ کی اسٹریٹجک اہمیت کے باعث ماضی میں بھی عالمی طاقتوں کی دلچسپی موضوعِ بحث رہی ہے، لیکن اس نوعیت کے دعوے یا مناظر فی الحال قیاس آرائی یا علامتی اظہار کے زمرے میں آتے ہیں۔

تاحال متعلقہ حکام کی جانب سے تصویر کے بارے میں کوئی باضابطہ بیان جاری نہیں کیا گیا، جبکہ مبصرین عوام کو غیر مصدقہ معلومات پر ردِعمل سے قبل احتیاط برتنے کا مشورہ دے رہے ہیں۔