امریکی ٹیرف پابندیوں کے بعد بھارت کی دعوٰی کردہ خودمختار خارجہ پالیسی پر سنگین سوالات اٹھنے لگے ہیں۔ عالمی فورمز پر غیر جانبداری کا دعویٰ کرنے والا بھارت امریکی معاشی دباؤ کے سامنے پسپائی اختیار کرتا دکھائی دے رہا ہے، جس سے اس کی سفارتی حکمتِ عملی کی کمزوری نمایاں ہو گئی ہے۔

امریکی وزیر خزانہ اسکاٹ بیسنٹ نے ایک بیان میں کہا ہے کہ امریکی ٹیرف پابندیوں کے بعد بھارت نے روسی تیل کی خریداری میں نمایاں کمی کی ہے۔ ان کے مطابق بھارتی ریفائنریوں کی جانب سے روسی تیل کی درآمد میں کمی امریکی پالیسی کی کامیابی ہے، جبکہ بھارت پر عائد 25 فیصد ٹیرف کے مثبت نتائج سامنے آنا شروع ہو چکے ہیں۔ امریکی وزیر خزانہ نے بھارت پر ٹیرف برقرار رہنے کی بھی تصدیق کی ہے، جس کی رپورٹ انڈین ایکسپریس نے شائع کی۔

میڈیا رپورٹس کے مطابق گزشتہ سال اگست میں امریکا نے بھارتی مصنوعات پر ٹیرف 50 فیصد تک بڑھا دیے تھے، جس کے بعد بھارتی برآمدات اور توانائی پالیسی دونوں دباؤ کا شکار ہو گئیں۔ ماہرین کا کہنا ہے کہ عالمی معاشی دباؤ اور پابندیوں پر عملدرآمد نے بھارت کے “وشو گرو” بننے کے خواب کو شدید نقصان پہنچایا ہے۔

تجزیہ کاروں کے مطابق بھارت کا خودمختاری کا بیانیہ امریکی پابندیوں کے سامنے کمزور ثابت ہوا ہے، جبکہ بھارتی خارجہ پالیسی حقیقت پسندی کے بجائے اندرونی سیاسی بیانیے، جذباتی نعروں اور ہندوتوا نظریات کی اسیر بنتی جا رہی ہے۔ ماہرین کا کہنا ہے کہ اگر بھارت نے اپنی خارجہ اور معاشی پالیسیوں کو زمینی حقائق کے مطابق نہ ڈھالا تو عالمی سطح پر اس کی ساکھ کو مزید نقصان پہنچنے کا خدشہ ہے۔