وفاقی وزیر امور کشمیر امیر مقام نے پشاور میں عوامی اجتماع سے خطاب کرتے ہوئے کہا کہ معرکہ حق میں کامیابی نے عوام کا ذہن بدل دیا اور فیلڈ مارشل اور وزیراعظم کے بہادرانہ فیصلوں نے دشمن کو شکست دی۔
امیر مقام نے کہا کہ سیکیورٹی فورسز ملک کی خاطر قربانیاں دے رہی ہیں اور خیبر پختونخوا کے عوام ہمیشہ پاکستان کے ساتھ کھڑے رہے ہیں۔ انہوں نے مزید کہا کہ صوبے کے لوگ امن اور روزگار چاہتے ہیں اور اس لیے جعلی بیانیہ اب دفن ہو چکا ہے، 8 فروری کی ہڑتال پر کسی نے دھیان نہیں دیا۔
وفاقی وزیر نے زور دے کر کہا کہ دہشت گردی کے خلاف سب کو ایک صفحے پر آنا ہوگا اور اپنے اداروں کو بدنام کرنے سے ملک کی خدمت نہیں ہوتی۔ انہوں نے کہا کہ چاہے قدرتی آفات ہوں یا دہشت گردی کا خاتمہ، فوج کی مدد سے ہی قوم محفوظ رہتی ہے، اور ایسا جذبہ بھارت کے پاس نہیں ہے۔
امیر مقام نے کہا کہ پشاور کے عوام نے جعلی بیانیہ کا جنازہ نکال کر واضح پیغام دیا ہے اور ملکی بہتری کے لیے اپنا کردار ادا کریں گے۔ انہوں نے مزید کہا کہ عوام کی خوشحالی نواز شریف اور شہباز شریف کے ایجنڈے کا حصہ ہے، اور وہ ایک بار پھر پشاور کو مسلم لیگ کا مضبوط گڑھ بنانے کے لیے کوشاں رہیں گے۔