وفاقی وزیر تعلیم اور ایم کیو ایم پاکستان کے کنوینر ڈاکٹر خالد مقبول صدیقی نے کہا ہے کہ صوبوں کی تقسیم کا طریقہ کار آئین میں واضح طور پر موجود ہے، اور اگر نئے صوبے بنانے سے پاکستان تقسیم نہیں ہوتا تو اس عمل کو متنازع کیوں بنایا جا رہا ہے۔
کراچی میں نجی یونیورسٹی کی تقریب میں خطاب کرتے ہوئے خالد مقبول صدیقی نے کہا کہ 18ویں ترمیم کے بعد بھی کئی مسائل حل نہیں ہوئے، مثال کے طور پر گھوسٹ اسکول کا مسئلہ ابھی باقی ہے۔ انہوں نے کہا کہ پنجاب اور سندھ کئی ممالک سے بڑے ہیں، اور بہتر طرز حکمرانی کے لیے انتظامی اصلاحات پر بات ہونی چاہیے۔
انہوں نے مزید کہا: “اگر پنجاب میں نئے صوبے بنانا جائز سمجھا جاتا ہے تو کیا کراچی یا سندھ کی انتظامی تقسیم پر بات کرنا ناجائز ہے؟”
ڈاکٹر خالد مقبول صدیقی نے نوجوانوں کی تربیت پر بھی زور دیا اور کہا کہ پاکستان میں تقریباً 15 کروڑ نوجوان ہیں، جنہیں ڈگریوں سے زیادہ ہنر اور مہارت کی ضرورت ہے۔ انہوں نے کہا کہ ہمارے ہمسایہ ممالک نے اپنی آبادی کو معاشی طاقت میں تبدیل کیا، جبکہ ہم نے کئی مواقع ضائع کیے۔ چین کی بڑی آبادی کے باوجود وہاں مہارت اور ٹیکنالوجی پر خصوصی توجہ دی جا رہی ہے، اور ہمیں بھی اسی جانب توجہ دینی چاہیے۔