کابل (نیوز ڈیسک) افغان شہری اب اپنے ہی جابر حکمرانوں کی دہشت گردی کا نشانہ بننے لگے ہیں۔ سخت گیر اور جابرانہ پالیسیوں کے بعد اختلافی آوازوں کو دبانے کے لیے افغان طالبان نے کھلے عام گولیاں برسانا شروع کر دی ہیں۔ اپنے حقوق کے لیے احتجاج کرنے والے ملازمین پر ظلم کی انتہا کر دی گئی ہے، جس سے طالبان کی آمریت اور انتہا پسندی مزید بے نقاب ہو گئی ہے۔

افغان میڈیا کے مطابق صوبہ فراہ میں طالبان اہلکاروں نے بربریت کا مظاہرہ کرتے ہوئے کسٹمز ملازمین کو فائرنگ کا نشانہ بنایا۔ طالبان اہلکاروں کی فائرنگ سے متعدد مظاہرین کے ہلاک اور زخمی ہونے کی اطلاعات موصول ہوئی ہیں۔

رپورٹس کے مطابق کسٹمز ملازمین طالبان رجیم کی جانب سے برطرفیوں اور تنخواہوں میں کٹوتی کے خلاف احتجاج کر رہے تھے، جس پر طاقت کے بے دریغ استعمال کا مظاہرہ کیا گیا۔

ماہرین کا کہنا ہے کہ افغان طالبان اپنی آمریت کو طول دینے کے لیے جائز حقوق کے لیے اٹھنے والی آوازوں کو بھی بندوق کے زور پر دبانے پر تُلے ہوئے ہیں۔ اقتدار پر قابض طالبان ٹولے نے قانون اور انصاف کو یکسر نظر انداز کر کے اپنے ہی شہریوں کی زندگی اجیرن بنا دی ہے، جو اس بات کا واضح ثبوت ہے کہ موجودہ طالبان حکمرانی عوام کے لیے مزید مشکلات اور عدم تحفظ کا سبب بن رہی ہے۔