تلنگانہ (نیوز ڈیسک)بھارتی اداکار وجے دیوراکونڈا نے شادی کے بعد پہلی بار اپنے آبائی گاؤں تھومانپیٹہ، تلنگانہ کا دورہ کیا، جہاں انہوں نے ایک اہم اور فلاحی اقدام کا اعلان کر کے سب کی توجہ حاصل کر لی۔ وجے اپنی اہلیہ اداکارہ رشمیکا مندانا اور خاندان کے ہمراہ نئے گھر کی گِرہہ پرَوِیش تقریب میں شریک ہوئے۔

اس موقع پر جوڑے نے ستیہ نارائن ورتَم پوجا بھی ادا کی۔ گاؤں میں خوشی اور جشن کا سماں تھا، تاہم اصل توجہ اس وقت حاصل ہوئی جب وجے دیوراکونڈا نے باہر جمع اپنے مداحوں سے خطاب کرتے ہوئے اسکالرشپ اسکیم کا اعلان کیا۔

وجے دیوراکونڈا نے بتایا کہ ان کا فلاحی ادارہ اچم پیٹ ڈویژن کے 44 سرکاری اسکولوں کے نویں اور دسویں جماعت کے طلبہ کو تعلیمی معاونت فراہم کرے گا۔ اس اسکیم کا مقصد طلبہ کو ان کے تعلیمی سفر کے اہم مرحلے پر سہارا دینا ہے تاکہ وہ بہتر مستقبل کی جانب بڑھ سکیں۔

اعلان کے فوراً بعد مجمعے میں زبردست تالیاں اور نعرے گونج اٹھے۔ رشمیکا مندانا اپنے شوہر کے ساتھ کھڑی مسکراتی رہیں جبکہ وجے کی والدہ جذباتی ہو گئیں اور فخر سے یہ منظر دیکھتی رہیں۔

وجے دیوراکونڈا نے دیہاتیوں سے وعدہ کیا کہ وہ اب باقاعدگی سے گاؤں آیا کریں گے اور مقامی مسائل سے بھی باخبر رہیں گے۔ سوشل میڈیا پر بھی اس اقدام کو خوب سراہا جا رہا ہے۔ ایک صارف نے لکھا، “اگر وجے مستقبل میں وزیر اعلیٰ بن جائیں تو حیرت نہیں ہوگی”، جبکہ ایک اور نے انہیں “حقیقی معنوں میں ہیرو” قرار دیا۔

یہ دورہ اس وقت ہوا جب چند روز قبل وجے دیوراکونڈا اور رشمیکا مندانا نے اپنی شادی کی تصدیق کی تھی۔ دونوں نے 26 فروری کو ادے پور میں نجی تقریب میں شادی کی، جبکہ 4 مارچ کو حیدرآباد میں ایک شاندار استقبالیہ رکھا جائے گا، جس میں شرکت صرف دعوت نامے کے ذریعے ممکن ہوگی۔

فلمی محاذ پر دونوں اداکار جلد ایک ساتھ فلم Ranabaali میں نظر آئیں گے، جس کی ہدایت کاری راہول سنکریتیان کر رہے ہیں۔ یہ فلم 11 ستمبر کو ریلیز کی جائے گی۔