وفاقی وزیر اطلاعات و نشریات عطاء اللہ تارڑ (Attaullah Tarar) نے قومی اسمبلی کے اجلاس میں وزارتِ اطلاعات کے مالی امور، منصوبوں اور اصلاحات کے حوالے سے تفصیلی گفتگو کی۔

انہوں نے بتایا کہ وزارتِ اطلاعات اور وزارتِ خزانہ کے درمیان سہ ماہی فنڈز ریلیز کرنے کا ایک طے شدہ نظام موجود ہے، جس کے تحت وسائل کو منصوبوں کی ضروریات اور استعمال کے مطابق جاری کیا جاتا ہے۔ ان کے مطابق زیادہ تر فنڈز پروکیورمنٹ اور جاری منصوبوں سے متعلق ہوتے ہیں، جن کی ادائیگیاں ون ٹائم بنیاد پر مکمل کی جاتی ہیں۔

عطاء اللہ تارڑ نے کہا کہ بعض اوقات فنڈز کی فراہمی مکمل ضروریات کے مطابق نہیں ہو پاتی کیونکہ اس کا انحصار مجموعی مالی گنجائش پر ہوتا ہے، تاہم حکومت کوشش کرتی ہے کہ جاری منصوبوں میں رکاوٹ نہ آئے۔

مزید پڑھیں؛ہانٹا وائرس کیس: کروز شپ نیدرلینڈز میں ڈس انفیکشن کے لیے زیرِ کارروائی

انہوں نے بتایا کہ وزارتِ اطلاعات میں ڈیجیٹل کمیونیکیشن ڈپارٹمنٹ کی ری ویمپنگ جاری ہے اور متعدد ترقیاتی منصوبے (PSDP) بھی تکمیل کے مراحل میں ہیں۔ اس کے ساتھ ساتھ پنشن اور دیگر اخراجات کے لیے بھی بروقت فنڈز جاری کیے جاتے ہیں۔

وفاقی وزیر کے مطابق حکومت کا مقصد سہ ماہی بنیادوں پر فنڈز کے مؤثر استعمال کو یقینی بنانا اور منصوبوں کی بروقت تکمیل ہے۔ انہوں نے کہا کہ اس حوالے سے فنانس ڈویژن نے بھی بھرپور تعاون فراہم کیا ہے۔

انہوں نے مزید بتایا کہ جامعات کے میڈیا ڈپارٹمنٹس میں وزارت کے تعاون سے آرٹیفیشل انٹیلیجنس (AI) سے متعلق نئے تربیتی پروگرام شروع کیے جا رہے ہیں تاکہ ڈیجیٹل میڈیا کے شعبے میں جدید مہارتوں کو فروغ دیا جا سکے۔