راولپنڈی (Rawalpindi) میں کھیلے جا رہے پہلے ون ڈے میں پاکستان کی شاندار بولنگ کے سامنے آسٹریلوی ٹیم 44.1 اوورز میں 200 رنز بنا کر آؤٹ ہو گئی، جس کے بعد میزبان ٹیم کو جیت کے لیے ایک نسبتاً آسان ہدف مل گیا۔

پاکستان نے ٹاس جیت کر پہلے بولنگ کا فیصلہ کیا، اور آغاز سے ہی بولرز نے آسٹریلوی بیٹنگ لائن اپ کو دباؤ میں رکھا۔ ابتدائی اوورز میں اوپنرز نے محتاط انداز اپنایا، تاہم جلد ہی پاکستانی اسپن اٹیک نے میچ کا رخ بدل دیا۔

خاص طور پر نوجوان اسپنر عرفات منہاس نے متاثرکن کارکردگی دکھاتے ہوئے چار اہم وکٹیں حاصل کیں اور آسٹریلوی بیٹنگ کو جھٹکا دیا۔ ابرار احمد نے دو کھلاڑیوں کو آؤٹ کیا، جبکہ کپتان شاہین شاہ آفریدی نے بھی دو وکٹیں حاصل کیں۔ نسیم شاہ اور محمد وسیم جونیئر نے ایک ایک وکٹ اپنے نام کی۔

مزید پڑھیں؛پاکستان ون ڈے کرکٹ میں بڑا سنگ میل عبور کرنے والی تیسری ٹیم بن گئی

آسٹریلیا کی جانب سے میتھیو شارٹ نے 55 رنز جبکہ میٹ رینشا نے 61 رنز کی ذمہ دارانہ اننگز کھیلی، تاہم باقی بیٹنگ لائن اپ پاکستانی بولنگ کے سامنے زیادہ دیر مزاحمت نہ کر سکی۔

کرکٹ شائقین اور سوشل میڈیا پر اس مقابلے کے حوالے سے دلچسپ ردعمل سامنے آ رہا ہے، جہاں کئی صارفین کا کہنا ہے کہ “آسٹریلیا کا انداز ٹیسٹ کرکٹ جیسا اور پاکستان کا کھیل ٹی20 جیسا محسوس ہوا”۔