پاکستانی اداکار فاران طاہر(Faran Tahir) نے معروف اداکارہ صبا حمید کے بیک وقت ان کی اہلیہ اور والدہ کا کردار ادا کرنے سے متعلق ناظرین کی حیرانی پر وضاحت کردی۔

فاران طاہر ان دنوں تین بڑے پاکستانی ڈراموں ’لیڈر‘، ’بس تیرا ساتھ ہو‘ اور ’درِ نجات‘ میں اداکاری کے جوہر دکھا رہے ہیں جنہیں ناظرین کی جانب سے بھی بھرپور پذیرائی مل رہی ہے۔

تاہم ناظرین کی توجہ اس دلچسپ اتفاق نے حاصل کرلی کہ ڈراما ’بس تیرا ساتھ ہو‘ میں صبا حمید، فاران طاہر کی اہلیہ کے کردار میں نظر آ رہی ہیں جبکہ ’درِ نجات‘ میں وہ ان کی والدہ کا کردار ادا کر رہی ہیں۔

مزیدپڑھیں:’او بی بی، میرے خلاف جو لانا ہے لے آؤ‘، پی ٹی آئی رہنما سلمان اکرم راجا اور مشال یوسفزئی کی مبینہ آڈیو لیک

دونوں ڈراموں کے بیک وقت نشر ہونے کے باعث ناظرین کے لیے یہ صورتحال خاصی دلچسپ اور حیران کن بن گئی جس پر فاران طاہر نے بھی وضاحت پیش کی۔

اداکار نے بتایا کہ دونوں ڈراموں کی شوٹنگ ایک دوسرے سے بالکل مختلف اوقات میں کی گئی تھی اور انہیں ایک ساتھ نشر کرنے کا منصوبہ نہیں تھا۔ ان کے مطابق دونوں پروجیکٹس کی شوٹنگ کے دوران ایسا نہیں ہوا کہ وہ بیک وقت دونوں ڈراموں کے سیٹس پر کام کر رہے ہوں۔

فاران طاہر کا کہنا تھا کہ دونوں ڈراموں کو ایک ساتھ نشر کرنے کا فیصلہ بعد میں چینل کی جانب سے کیا گیا جس کے باعث ناظرین کو صبا حمید کے دونوں مختلف کردار بیک وقت دیکھنے کو مل رہے ہیں۔