بانی: عبداللہ بٹ      ایڈیٹرانچیف : عاقل جمال بٹ

بانی: عبداللہ بٹ

ایڈیٹرانچیف : عاقل جمال بٹ

بلاول بھٹو کے بیان میں انتخابی معاملات سے متعلق بنیادی حقائق نظرانداز ہوئے: ذرائع

اسلام آباد میں الیکشن کمیشن آف پاکستان کے ذرائع نے چیئرمین پاکستان پیپلز پارٹی بلاول بھٹو زرداری کے انتخابی معاملات سے متعلق حالیہ بیان پر اپنا مؤقف پیش کرتے ہوئے کہا ہے کہ ان کے بیان میں آئینی اور قانونی تقاضوں کے بنیادی حقائق کو نظر انداز کیا گیا ہے۔

الیکشن کمیشن کے ذرائع نے کراچی پریس کلب میں بلاول بھٹو زرداری کے ’میٹ دی پریس‘ سے خطاب کے حوالے سے کہا ہے کہ قوانین کے تحت مخصوص نشستوں کی حقدار صرف وہی سیاسی جماعتیں ہوتی ہیں جو باضابطہ طور پر بطور جماعت عام انتخابات میں حصہ لیں۔ ذرائع کے مطابق تمام سیاسی جماعتوں پر یہ لازم ہے کہ وہ انتخابات کے انعقاد سے قبل مقررہ مدت کے اندر مخصوص نشستوں کے لیے اپنے امیدواروں کی ترجیحی فہرست جمع کرائیں، جبکہ پاکستان تحریک انصاف (پی ٹی آئی) کی جانب سے ایسی کوئی فہرست جمع نہیں کرائی گئی تھی۔

دوسری جانب بلاول بھٹو زرداری نے اپنے خطاب میں تحریک انصاف سے انتخابی نشان واپس لینے کے حکم کو غیر قانونی قرار دیا تھا۔ اس نکتے پر مؤقف اختیار کرتے ہوئے الیکشن کمیشن کے ذرائع کا کہنا ہے کہ الیکشنز ایکٹ 2017 کے سیکشن 208 اور 209 ہر سیاسی جماعت کو شفاف انٹرا پارٹی انتخابات کرانے کا پابند بناتے ہیں، اور پی ٹی آئی مقررہ قانونی معیار اور خود اپنے پارٹی آئین کے مطابق انٹرا پارٹی انتخابات کرانے میں ناکام رہی تھی۔