بانی: عبداللہ بٹ      ایڈیٹرانچیف : عاقل جمال بٹ

بانی: عبداللہ بٹ

ایڈیٹرانچیف : عاقل جمال بٹ

ملکی صرافہ مارکیٹوں میں سونے کی قیمت میں پندرہ ہزار روپے سے زائد کمی

کراچی: امریکی شرحِ سود میں اضافے کے اندازوں کے باعث عالمی اور مقامی صرافہ مارکیٹوں میں سونے کی قیمتوں میں بڑی گراوٹ ریکارڈ کی گئی ہے، جس کے نتیجے میں پاکستان میں فی تولہ سونا مزید 15 ہزار 400 روپے سستا ہو کر 3 لاکھ 79 ہزار 836 روپے کی سطح پر آ گیا ہے۔

آل پاکستان جیمز اینڈ جیولرز ایسوسی ایشن کی جانب سے جاری کردہ تازہ ترین نرخوں کے مطابق جمعہ کے روز ملک بھر کی صرافہ مارکیٹوں میں سونے کی قیمتوں میں تیزی سے کمی دیکھنے میں آئی، جہاں گزشتہ دنوں فی تولہ سونا 4 لاکھ روپے کی حد سے نیچے آنے کے بعد آج مزید ہزاروں روپے سستا ہو گیا۔ ایسوسی ایشن کے اعداد و شمار کے مطابق فی تولہ سونے کے بھاؤ میں 15 ہزار 400 روپے کی بڑی کمی ہوئی جس کے بعد نئی قیمت 3 لاکھ 79 ہزار 836 روپے مقرر کی گئی ہے، جبکہ 10 گرام سونے کا بھاؤ 13 ہزار 203 روپے کم ہو کر 3 لاکھ 25 ہزار 648 روپے کی سطح پر آ گیا ہے۔

دوسری جانب بین الاقوامی بلین مارکیٹ میں بھی سونے کی قیمتوں میں شدید مندی کا رجحان رہا اور عالمی بازار میں فی اونس سونے کا بھاؤ 154 ڈالر کی بڑی کمی کے بعد 3 ہزار 573 ڈالر فی اونس ریکارڈ کیا گیا۔ معاشی ماہرین کے مطابق امریکی شرحِ سود میں ممکنہ اضافے کے خدشات اور اندازوں کی وجہ سے عالمی منڈی میں سونے کی قیمتیں تیزی سے نیچے آ رہی ہیں، جس کے براہِ راست اثرات مقامی صرافہ مارکیٹ پر بھی مرتب ہو رہے ہیں۔