اسلام آباد(مانیٹرنگ ڈیسک) متحدہ اپوزیشن نے تحریک عدم اعتماد کی ووٹنگ پُرامن اور بلا روک ٹوک کرانے کے لیے عدالت میں درخواست دائر کرنے کا فیصلہ کرلیا۔ اپوزیشن کی جانب سے کل اسلام آباد ہائی کورٹ میں اس حوالے سے درخواست دائر کیے جانے کا امکان ہے۔ مسلم لیگ ن کے جنرل سیکریٹری رہنما احسن اقبال ، جے یو آئی رہنما مولانا عبدالغفور غفور حیدری اور سینیٹر اعظم نذیر تارڑ درخواست دائر کرنے کے لیے اسلام آباد ہائیکورٹ پہنچے جہاں انہوں نے میڈیا سے گفتگو کرتے ہوئے کہا کہ ممبران قومی اسمبلی کو تحریک عدم اعتماد میں ووٹنگ سے روک کر آئینی ذمہ داری نبھانے سے نہ روکا جائے۔ انہوں نے بتایا کہ متحدہ اپوزیشن اس حوالے سے پٹیشن کل تک فائل کرے گی۔ جمعیت علما اسلام کے رہنما عبد الغفور حیدری نے کہا کہ انہوں (حکومت) نے ایسا ماحول پیدا کیا ہے جس سے اپوزیشن نے بھی تلوار نیام سے نکال لی ہے جو کو اب بغیر نتیجے کے واپس نیام میں رکھنا مشکل ہوگا،انشاء اللہ سیاسی طور پر ایسی تاریخی شکست دیں گے کہ یہ یاد رکھیں گے۔ انہوں نے کہا کہ تحریک عدم اعتماد کا فیصلہ پارلیمنٹ میں ہوگا، حکمرانوں نے بوکھلاہٹ میں آکر پارلیمنٹ لاجز میں دھاوا بولا،وہاں خواتین اراکین اسمبلی تھیں انہیں بھی زد کوب کیا گیا۔جے یو آئی رہنما کا کہنا تھا کہ بات چیت کا دروازہ کبھی بند نہیں کیا، مسئلہ ہم نے تو پیدا ہی نہیں کیا، عمران خان اور عمرانی ٹولہ مسلسل دھمکیاں دے رہا ہے کہ ہم پارلیمنٹ کے اجلاس میں اپنے اراکین کو ووٹ نہیں ڈالنے دیں گے۔عبدالغفور حیدری نے کہا کہ اسی طرح وہ 27 مارچ کو ایک پروگرام کرنا چاہتے ہیں، جس سے وہ ایم این ایز کو خوف زدرہ کریں گے، یہ تو کھلم کھلا ریاست کے اندر ریاست ہے اور ریاست کی رٹ کو چیلنج کرنے کے مترادف ہے۔ ادھر اپوزیشن جماعتوں کے وکلا کا کہنا ہے کہ تینوں اپوزیشن جماعتوں نے اسلام آباد ہائیکورٹ میں درخواست جمع کرانے کے لیے ڈرافٹ تیار کرلیاہے اور کل جمع کرادیا جائے گا۔اپوزیشن اتحاد کی جانب سے جے یو آئی سے مولانا عبدالغفور حیدری، مسلم لیگ ن سے احسن اقبال اور پیپلز پارٹی سے فرحت اللہ بابر درخواست دائر کریں گے۔